Өзбекстанда қазақ өнімдеріне сұраныс артты

Бүгін Ташкентте Қазақстан мен Өзбекстанның бизнес өкілдері құны 71 млн доллар болатын келісімшартқа қол қойды.

Сауда саттық форумы аясында өткізілген шараға екі елдің үкімет мүшелері, кәсіпкерлер мен бизнес қауымдастығы қатысты. Қос ел 2030 жылға дейін өзара сауда айналымын 10 млрд долларға жеткізуді көздеп отыр. 

Қазақстанның күнбағыс майы Өзбекстанда үлкен сұранысқа ие. Көрші ел өнімнің 65 пайызын бізден сатып алады. Сол сияқты рапс пен соя бұршақтарына да қызығушылық жоғары. Қазақстанның бизнес қауымдастығы Орталық Азиядағы адами капиталдың жыл санап өсуіне байланысты өнім көлемін еселеуді көздеп отыр.

Александр Яшков, Қазақстанның май өнімдерін өндірушілер қауымдастығының атқарушы директоры:

- Біздің шаруалар да қазір күнбағыс алқаптарын молайтуға ынталы. Себебі әлемдік нарықта майға деген сұраныстың артуын жақсы біліп отыр. Тауардың көлемін еселеу бойынша үлкен жоспарлар бар. Қазақстан әлемнің ең ірі күнбағыс майын өндіретін үш мемлкеттің қатарына қосылуға күш салады. Оған біздің толықтай мүмкіндігіміз бар.

Бүгінде Өзбекстанда Қазақстан капиталының қатысуымен 1 мың 100 кәсіпорын жұмыс істейді. Әсіресе құрылыс, медицина, қаржы нарығы мен ай- ти салада Қазақстан компанияларының үлесі басым.

Аврор Курбанов, «Uztrade» АҚ басқарма басшысы:

- Екі елдің экономикалары бірін-бірі толықтырып жатыр. Бұл жақсы үрдіс. Мемлекет басшылары да осындай тапсырма берді. Біздің кәсіпорындарымыз енді бірлескен өнімдерін үшінші мемлекеттерге сатуды қолға алуы тиіс. Осы тұрғыда үлкен жұмыстар атқарылып та жатыр.

Сауда саттық форумына мемлекеттік деңгейде мән берілген. Үкімет мүшелері кәсіпкерлердің пікірлерін тыңдап, мәселе туындаған жағдайда, оны бірігіп шешудің тетіктерін қарастырды.

Айдар Әбілдабеков,  ҚР Сауда және интеграция вице-министрі:

- Мысалы, 2024 жылы 4 млрд 100 млн долларға сауда саттық жасастық. Биыл 8 айда 3 млрд асып отырмыз. Былтырғы кезеңмен салыстырғанда 18 пайызға өсім бар. Жалпы 2030 жылға дейін 10 млрд жеткіземіз деп сенеміз.

Екі ел кәсіпкерлері түрлі сала бойынша құны 71 млн доллар болатын келісімшартқа қол қойды. Сондай-ақ бизнес қауымдастықтардың бір-бірімен ақпарат алмасуы үшін В2В форматындағы кездесулер ұйымдастырылды.