Еуропада электркарларға сұраныс артты

Еуропа жұрты электр қозғалтқышы бар гибридті көліктерге қатты қызығады.

Бұл үрдіс кәрі құрлықтағы басты автокөрмелердің бірі «Брюссель мотор шоу 2026-да» айқын байқалды. Еуропалықтар тағы қандай темір тұлпарларды таңдайды? Құрлықтағы нарық бәсекесінде кім жүйрік? 

Еуропа дизель және жанар маймен емес, гибридті және толығымен тоқпен жүретін көліктерге ауысып жатыр. Іштен жанатын қозғалтқышы бар дәстүрлі көліктер ешқайда жоғалып кетпейді, бірақ бұрынғыдай зор сұранысқа ие емес. Олар ескіше бензинмен жүре бергісі келетіндердің таңдауы болып қала бермек.

Нарықтағы соңғы деректерге сәйкес, 2025 жылдың қаңтар–қараша айларында ЕуроОдақта электрлі автомобильдердің үлесі шамамен 17%, ал гибридтердікі – 35% болған. Бензин мен дизельдің жиынтық үлесі болса шамамен 36%-ды құрайды. Брюссельдегі автосалон да технологиялық өзгеріс кезең-кезеңімен жүріп жатқанын көрсетеді. Еуропалықтардың автомобиль таңдаудағы талғамы біртіндеп өзгеруде.

Анук Ван Влиет, Еуропалық автоөндіруші өкілі:

- Біз сатып алушылардың гибридті модельдерге деген қызығушылығының жоғары екенін көріп отырмыз. Кейбірі қашық жерлерге электрлі көлікпен бару қауіпті деп санайды. Дегенмен біз ұсынған модельдердің арасында қуаты 400, тіпті 700 шақырымға дейін жарайтындары бар. Мақсатымыз – тұтынушының қажеттілігін қанағаттандыру.

Көрмеде Қытай автокомпаниялары да ерекше назарда болды. Олар баға, жабдықталу деңгейі және мықты электрлі модельдері арқылы бұқаралық сегментке нық сеніммен кіріп жатыр. Бұл еуропа көшелерінде де байқалады. Халықаралық сараптамалық компаниялардың дерегінше, өткен жылдың мамыр айында Қытай өндірушілерінің Еуропадағы үлесі 6%-ға жуықтап, бір айда шамамен 66 мың көлік сатылған. Мұнда тек баға емес, технология да шешуші факторға айналып келеді.

Ральф Ван Мер, Қытай автоөндірушісінің өкілі:

- Бүгінде бастысы тек көлік емес, оның қозғалысы мен цифрлық мүмкіндіктері болып тұр. Қазір сатып алушылар заманауи технологияларға көбірек мән береді. Ал Қытай инновациялар бойынша көш ілгері. Сондықтан еуропалық клиенттердің көңілі бізге ауып тұр.

«Брюссель мотошоуы» осымен 102-рет өткізіліп отыр. Пандемия кезінде жабылып қалған Женева автосалоны жұмысын жаңғыртқан соң, Брюссель Еуропадағы басты автопремьера алаңдарының біріне айналды. Көрмеге барлығы 64 бренд қатысты. Мұнда келушілер жай көрермен болып қана қоймай, нақты таңдау жасауға дайын. Көбіне көліктің ішіне отырып, саралап, сервистік шарттары мен бағасын нақтылайды.

Эрик Глад, сатып алушы:

- Мен жаңа көлік іздеп жүрмін. Мұнда өте ыңғайлы. Көптеген брендті бір жерден табуға болады. Барлығын салыстыруға мүмкіндік бар, автосалондарды жеке-жеке аралап шығудың қажеті жоқ.

Көрмеде «Еуропаның жыл автомобилі» де анықталды. Үздік темір тұлпарлар өз деңгейіне қарай сараланды. Қазылар алқасының бүйрегі өз елінің брендтеріне бұрды: француздар Citroen C5 Aircross моделін, ал италиялықтар Fiat Grande Panda-ны таңдады. Бірақ көп сарапшылар Mercedes CLA-ны жеңімпаз деп тапты. Бұл модель гибридті және электрлі нұсқада ұсынылған. Соңғысы тиімділігі және қолжетімді бағасымен ерекше. Құны шамамен 30 млн теңгеден басталады.

Авторы: Ғалымжан Қараманұлы