Пациентті қабылдаудан бас тартты ер адам Оралдағы ауруханадан миллиондап өндіріп алды

Орал тұрғыны әкесінің қазасынан кейін қалалық ауруханадан 4 миллион теңге моральдық зиян өтемақысын өндіріп алды. Сот медициналық көмектің уақтылы көрсетілмеуі науқастың ажалдан аман қалу мүмкіндігінен айырды деген қорытындыға келді, деп хабарлайды TengriHealth Жоғарғы сотқа сілтеме жасап.

Іс материалдарына сәйкес, Орал қаласының 58 жастағы тұрғыны аурухананың жансақтау бөлімінде көз жұмған. Әкесінің өлімінен кейін ұлы полицияға арызданғанымен, қылмыстық құқық бұзушылық құрамының болмауына байланысты сотқа дейінгі тергеу тоқтатылған.

Сонымен қатар Денсаулық сақтау министрлігі Медициналық және фармацевтикалық бақылау комитеті департаментінің тексерісі науқасқа медициналық көмек көрсету кезінде заңбұзушылықтар орын алғанын анықтады.

Ер адам медицина қызметкерлерінің әрекеті мен әрекетсіздігі әкесінің өліміне себеп болды деп есептеп, аурухана мен емдеуші дәрігердің үстінен моральдық зиянды өндіру туралы талап арыз түсірді.

Орал қаласының № 2 соты науқастың бірнеше рет медициналық көмекке жүгінгенін, алайда оны мас күйінде деп есептеген мамандар қажетті тексеруден өткізуден үнемі бас тартқанын анықтады.

"Бұл ретте ағзадағы алкоголь мөлшерін анықтау үшін ешқандай зерттеу жүргізілмеген. Денсаулық сақтау басқармасының call-орталығына хабарласқаннан кейін ғана науқас терапия бөлімшесіне жатқызылып, оған ишемиялық инсульт диагнозы қойылған. Емдеу шаралары басталғанымен, ертесі күні науқас қайтыс болды", - деп хабарлады сот.

Аурухана өкілі талап арызды мойындамады. Прокурор талаптарды ішінара қанағаттандыру туралы қорытынды берді.

Іс материалдарын зерделей келе, сот медициналық көмектің кеш көрсетілуі науқастың өлімін болдырмаудың шынайы мүмкіндігін жоғалтуға әкеп соқты деген тұжырым жасады.

"Сот әкесінің қазасы талап қоюшыға терең рухани қасірет әкелгенін, ал медицина қызметкерлері тарапынан анықталған заңбұзушылықтар оның әділетсіздік, дәрменсіздік, ашу-ыза мен эмоционалдық күйзеліске түсуіне негіз болғанын атап өтті", - делінген хабарламада.

Нәтижесінде сот талап арызды ішінара қанағаттандырып, ауруханадан моральдық зиян өтемақысы ретінде 4 миллион теңге өндірді.

Сот шешімі заңды күшіне енді.

Google News арқылы жаңалықтарымызды қадағалаңыз