Павлодарда 9 тілде еркін сөйлейтін оқушы Астанадан пәтер сатып алды

АСТАНА, 8 ақпан – Sputnik. Павлодарда 9 тілде еркін сөйлейтін Айханым Оқасова өз еңбегінің нәтижесінде Астанадан баспана сатып алды.

11-сынып оқушысы қазір шет тілін үйренуге ниетті азаматтарға дәріс береді, деп хабарлайды Жетінші арна.

Тіл үйренуге деген қызығушылық Айханым Оқасоваға анасынан дарыған. Алдымен ағылшын тілін үйреніп, уақыт өте келе француз тіліне ерекше сүйіспеншілік танытқан.

"Француз тілінен кейін Павлодар қаласындағы Жастар ресурстық орталығында кәріс тілі бойынша тегін курстар ашылды. Кейін курс аяқталса да, бірақ бұл тілге деген қызығушылығым басылған жоқ. Иероглифтермен алғаш рет бетпе-бет келген тәжірибем еді. Корей тілін жақсы деңгейде меңгергеннен кейін араб тілін үйрене бастадым, ал араб тілінен соң қытай тіліне көштім. Қазіргі таңда түрік және неміс тілдерінде еркін сөйлей аламын", - дейді Айханым.

Полиглот шет тілдерін меңгеруді 6-сыныптан бастаған. Көптеген тілді ол өз бетінше оқулықтар мен бейнесабақтар және тікелей қарым-қатынас арқылы үйренген.

"Әртүрлі материалдар алатынмын. Мәселен, орыс тіліндегі мақалаларды қазақ тіліне аударатынмын. Араб тілінен корей тіліне, корей тілінен араб тіліне, қытай тілінен ағылшын тіліне, ағылшын тілінен қытай тіліне аударып жаттығатынмын. Сонымен қатар тіл тасымалдаушыларымен де көп тәжірибе жасадым. Оларды өзім интернет арқылы тауып, байланыс орнаттым. Шетелде тұратын достарым мен таныстарым көп, солармен сөйлесіп, жаттықтым", - дейді ол.

Бүгінде Айханым 9 тілді жетік меңгеріп, білімін одан әрі жетілдіріп жүр. Ол үшін тіл – түрлі мемлекеттің мәдениетін танып, адамдармен байланыс орнатудың негізгі құралы.

"Кез келген адамның тіл меңгеруге қабілеті бар, бірақ ол үшін үзбей оқып жүру керек деп ойлаймын. Адамның нақты мақсаты болса, ол кедергілерге де, қиындықтарға да қарамайды. Менің өзімде де бәрі бірден бола қойған жоқ. Егер бастауыш сыныптарда "сен бірнеше тілде сөйлейтін боласың" десе, ешқашан сенбес едім. Әрине, қиын болып бәрін тастағым келген кездер де болды. Бірақ жылдар өте келе бірнеше тілді меңгердім", - дейді Айханым Оқасова.

Қазір Айханым мектепте оқиды, әрі шет тілдерінен онлайн сабақ береді. Жас полиглот болашақта беделді шетел университетіне оқуға түсіп, жер жаһанды аралауды армандайды.