Павлодарда шағынаудандарды жаңарту жобасы басталды

Павлодарда тозығы жеткен ескі үйлердің орнына заманауи үлгіде жаңа тұрғын үй кешендері салынады, деп хабарлайды 24KZ. Қазір өңірде шағынаудандарды жаңарту жобасы іске асып жатыр. Бұл жоба қаланың сәулетін жақсартумен қатар тұрғындардың өмір сүру сапасын арттыруға бағытталған. Облыс орталығында 46 ескі үй бар. Алғашқы жұмыс Затон шағынауданында басталды.

Павлодарда мұндай тәжірибе бар. Бұрын Алюминстрой шағын ауданындағы екі қабатты 145 сабан үй сүріліп, олардың орнына жаңа Сарыарқа шағынауданы салынған еді. Араға 10 жыл салып, кезек басқа аудандарға да жетті.

Іргетасы сонау 70-80 жыл бұрын қаланған бұл үйлердің пайдалану мерзімі әлдеқашан өтіп кеткен. Соған қарамастан Затон шағынауданындағы 20 шақты үйде тұрғындар әлі күнге дейін өмір сүріп жатыр. Жергілікті атқарушы билік кезінде уақытша баспана ретінде салынған ескі үйлердің бәрін сүруге шешім қабылдады. Көп ұзамай бұл жерде жаңа шағынаудан пайда болады.

Светлана Исмаилова өзі тұратын ауданды «трущобы» деп сипаттайды. 1937–1949 жылдар аралығында салынған үйлерде коммуналдық инфрақұрылым мүлде жоқ. Үйлер пешпен жылытылады, ал суды тасып ішеді. Сондықтан инвесторлар ұсынған шартқа ойланбастан келісіпті. Әзірге пәтер жалдап тұрып жатыр. Қоныстойын тойлайтын күн де алыс емес.

Светлана Исмаилова, қала тұрғыны:

- Менеджерлер келіп жаңа үйден баспана аласыз дегенде қуанышым қойныма сыймады. Мен іргесі 1949 жылы қаланған үйде 30 жылға жуық тұрдым. Онда  көп пәтерлер бос қалған еді. Бұл менің ұзақ күткен қуанышым. Баспалы болатыныма кәміл сенемін.

Тозығы жеткен үйлерде тұру қауіпті. Сондықтан кейбір тұрғындар пәтер жалдауға мәжбүр. Ал бос қалған үйлерге қаңғыбастар мен нашақорлар жиналады. Бұл ауданда өрт оқиғалары да жиі тіркеледі. Биыл жергілікті атқарушы билік қаланы жаңарту жобасы аясында апатты үйлерді толық жоюға шешім қабылдады.

Асхат Жүсіпов, мердігер компания өкілі:

- Бұл құрылыс үш жыл бұрын басталған еді. Осы жылдың соңына дейін аяқтаймыз деп отырмыз. Тұрғындарға ұнайды деп ойлаймын. Себебі олар тұрып жатқан жағдаймен салыстыруға болмайды.

Жоспарға сәйкес қала бойынша 46 ескі үй сүріледі. Оның 20-сы Затон шағынауданында орналасқан. Теміржол вокзалы ауданында 17 ескі үй сүріліп, 8 көпқабатты тұрғын үйдің құрылысы басталады. Бұл үйлерде барлығы 384 пәтер болады.

Арсланбек Қабдықайыр, Павлодар қ. сәулет және қала құрылысы бөлімінің сектор меңгерушісі:

- Затон шағынауданында жүзеге асып жатқан құрылыс жобасына сәйкес 20 апатты үй сүріледі. Олардың орнына жеті жаңа көпқабатты тұрғын үй салу көзделіп отыр. Ескі үйлердің орнына жаңа тұрғын үй кварталдарын салу үшін инвесторлармен арада меморандум жасалды. Апатты үйлерден көшірілген тұрғындарға уақытша баспана жалдау шығынын өтеу үшін өтемақы төленеді.

Алдағы жылы облыс орталығында бюджет қаражатына көпқабатты 4 үйдің іргесі қаланады. Сонымен қатар инвесторлық жоба аясында 12 қабатты екі үй пайдалануға берілмек.

Авторлары: Қарлығаш Қасиетова, Дәулет Қошқарбаев, Марат Игіліков