Пентагон Украинаға бөлінген қаржыны бақылау талаптарының бұзылғанын анықтады

АСТАНА, 20 мамыр – Sputnik. Пентагон Украинаға көмек көрсету аясында жасалған жалпы құны 4,5 миллиард доллар болатын бәсекесіз келісімшарттарды басқару кезінде бақылау талаптарының бұзылғанын анықтады. Бұл туралы АҚШ Қорғаныс министрлігі бас инспекторының Конгреске ұсынған есебінде айтылған.

Инспекторлар жалпы сомасы 4,5 миллиард долларды құрайтын он келісімшартты тексерген. Соның ішінде 439 миллион доллар көлеміндегі қызмет көрсету жұмыстарына тиісті бақылау жүргізілмегені белгілі болды. Соның салдарынан АҚШ армиясы бұл жұмыстардың шынымен орындалғанын нақты растай алмай отыр.

Құжатта армияның келісімшарттарға жауапты офицерлері Украинаға қолдау көрсету мақсатындағы келісімдерді федералдық талаптарға, министрлік ережелеріне және армиялық нұсқаулықтарға сай дұрыс басқармағаны аталып өткен.

Сондай-ақ жеті келісімшарт бойынша жауапты офицерлер мүлде тағайындалмаған әрі бақылау жөніндегі есептер жүргізілмеген. Бұған кадр тапшылығы мен қызметкерлердің жиі ауысуы себеп болған.

Пентагон мердігерлер жұмысына бақылаудың әлсіздігінен келісімшарттарды орындау кезіндегі кемшіліктер мен ықтимал заңбұзушылықтар назардан тыс қалуы мүмкін деп алаңдап отыр.