Шыңғыс Айтматовтың қарындасы ағасының 100 жылдығына бөлінген қаржыны халық игілігіне жұмсауды ұсынды

Шыңғыс Айтматовтың қарындасы Роза Айтматова жазушының 100 жылдығына бөлінетін қаржыны салтанатты іс-шараларға емес, халықтың тұрмысын жақсартуға бағыттауды сұрады. Бұл туралы оның үндеуін «Кабар» ақпарат агенттігі жариялады.

Айтматованың айтуынша, мерейтой аясында бөлінетін қаражат қоғам үшін нақты пайда әкелуі тиіс.

— «Айтматовтың 100 жылдығына бөлінген қаражатты басқа маңызды істерге жұмсауға болар еді» деген пікір міндетті түрде айтылады деп ойлаймын. Сондықтан үкіметтен сол қаражатты халықтың әл-ауқатын арттыруға бағыттауды алдын ала сұраймын. Бұл — ағама көрсетілетін шынайы құрмет болар еді», — деді Роза Айтматова.

Сондай-ақ ол жазушының дүниеден өткеніне 17 жыл өтсе де, кейбір адамдардың әлі күнге дейін оны талқылап, сынап жүргенін өкінішпен атап өтті және Айтматовтың рухын құрметтеуге шақырды.

Айта кетейік, бұған дейін Қырғызстан Қаржы полициясының бұрынғы басшысы Сыймык Жапыкеев журналист Ернис Қыязовқа берген сұхбатында Шыңғыс Айтматовтың шығармашылығын сынға алып, оның еңбектерін «орташа» әрі «бес тиындық» деп бағалаған болатын.

Бүгін, 18:00