Петропавлда Аяз атаға арналған ерекше көрме өтіп жатыр

Петропавл тұрғыны 135 аяз ата мүсінін жинаған.  

Ең көне жәдігерге шамамен жүз жылдай болыпты. Жаңа жылдың басты  кейіпкерінің мүсіндерін Анна Ляшенко 20 жыл бойы сақтап келеді. Жүрген жерінде ерекше қуыршақ сатып алуды әдетке айналдырған. Оның коллекциясы мереке қарсаңында  көрмеге қойылды.

Анна Ляшенко балалық шағында өз үйіндегі шыршаның түбінде тұрған қуыршақ Аяз атаны көріп, оны табуды армандаған. Осы оқиға  коллекция  жинауға  түрткі болыпты. Бүгінде қолында жүзден астам  Аяз ата мүсіні бар. 

Анна Ляшенко, коллекционер:

- Бұл арнайы тұздың тұтас кесегінен жасалған Аяз ата. Мұнда сымға ілуге арналған тесік, шамға арналған орын болған. Яғни шам ретінде пайдаланылған.  Коллекциямдағы ерекше дүниелердің бірі.

Биыл коллекционер мүсіндерді ботаника бағындағы көрмеге қойды. Сөйтіп, қала тұрғындары балалық шағындағы Аяз атаны тамашалауға мүмкіндік алды. Анна Ляшенко оларды температурасы қалыпты және құрғақ жерде сақтайды. Ультракүлгін сәулесі зиянды болғандықтан қараңғы жерге қояды. Мұнда Аяз атаның пластик, пенопласт, мата, гипс,  картон, шыны сынды түрлі материалдан жасалған түрі бар. Ең көнесі 1930 жылдарға жатады. Анна оны Алматыға барғанда сатып алған.

Анна Ляшенко, коллекционер:

- Бұл ерекше дүние. Денесі тығыз картоннан, аяғы ағаштан жасалған. Ең көне Аяз ата осы. Мұндайды ешқайдан таппайсыз. 

Көрмеде Аяз атадан бөлек,  өзге коллекционерлер әкелген Ақшақарлар, гирляндалар және әр жылдардағы жаңа жылдық ойыншықтар да қойылған. Соның бірі мына ерекше шырша.

Артур Рязапов, ботаника бағының директоры:

- Бұл шырша балалық шақтың бөлшегі іспетті. Біз Жаңа жылда ата-әжемізге барып осы шыршаны қосып беруді сұрайтынбыз. Ол айналып тұрғанда  біз үшін нағыз сиқыр еді. Есейе келе түсіндік. Оны қосқан кезде жылы ауа жоғары көтеріліп, мына қуыстарды үрлеп шыршаны айналдырады екен.  Отбасылық ерекше жәдігер. 

Ботаника бағында Жаңа жыл сайын осындай ерекше көрме көпшілік назарына ұсынылады. Оған келушілер бір сәт балалық шаққа саяхат жасайды.

Руслан Нұрланұлы, Наталья Волкова, Қуаныш Қазбеков