Петропавлда ер адам полиция бөлімшесінде басын қабырғаға әдейі ұрған

АСТАНА, 3 желтоқсан – Sputnik. Петропавл полициясы 39 азаматты маскүнемдіктен мәжбүрлеп емдеуге жіберді, деп хабарлайды Солтүстік Қазақстан облыстық полиция департаменті.

Мұндай азаматтардың бірі - 43 жастағы қала тұрғынын қалалық бірінші полиция бөлімі мәжбүрлеп емдеуге жіберу үшін қажетті құжаттарды жинастырған.

"Тіркеу рәсімін өткізу үшін оны Egov порталы арқылы қызмет алу мақсатында учаскелік полиция пунктіне жеткізу қажет болған. Сол жерде ол кенеттен қабырғаға басын ұра бастады. Оның әрекеті бейнебақылау камерасына жазылып жатқанын өзі де байқамаған. Кейін ол мұны өзіне наркологиялық ұйымға мәжбүрлі емдеуге жіберілуіне "қарсылық белгісі" ретінде жасағанын айтқан", - дейді ведомстводағылар.

Дәрігерлер оған қажетті медициналық көмекті көрсетті. Қазіргі уақытта ол әкімшілік қамауды өтеуді жалғастырып жатыр.

Жалпы жыл басынан бері Петропавлда қоғамдық орында алкогольдік ішімдік ішу немесе мас күйінде жүру фактілері бойынша 5 мыңнан астам адам әкімшілік жауапкершілікке тартылды.