Петропавлда имаммен сұхбат журналист үшін айыппұлмен аяқталды

Айыппұлға қатысты оқиға бүгінгі күні ақпарат тарату мен сөз үшін жауапкершіліктің арасындағы шекараның қаншалықты нәзік екенін көрсетті. Әңгіме арандату немесе қорлау туралы емес, Құрбан айт мерекесінің мәнін түсіндірген имаммен сұхбат жайлы еді

Материал жарияланғаннан кейін ол әкімшілік жазаға себеп болды. Неліктен дәл осы жағдай орын алды және рұқсат етілген нәрсенің шекарасы қайда деген мәселе 20 қаңтарда Астанада өткен «Стереотипсіз БАҚ-тағы дін» атты конференцияда талқыланды. Жиынға «Ақ Жайық» тілшісі де қатысты.

Қатысушылар дін тақырыбының қоғамдық кеңістікте ең сезімтал бағыттардың бірі екенін айтты. Тіпті бейтарап түсіндірмелік материалдар да заң бұзушылық ретінде қабылданса, санкцияға әкелуі мүмкін. Соның салдарынан журналистер мен авторлар көбіне қай жерде ақпарат тарату аяқталып, қай жерде жаза қаупі басталатынын түсінбей, белгісіздік жағдайында жұмыс істейді.

Жарияланымдардың тіл қолданысына бөлек назар аударылды. Жанжалдарға қатысты жаңалықтарда көбіне оқиғаның мәніне қатысы болмаса да, сыртқы діни белгілерге – хиджабқа, сақалға, діни киімге мән берілетіні айтылды. Мұндай тәсіл қоғамда тұрақты стереотиптерді қалыптастырып, шиеленісті күшейтеді.

Православ шіркеуінің өкілі де өз пікірін  білдірді. Қазақстандағы православ шіркеуінің істерін басқарушы епископ Геннадий Гоголев діннің қоғамдық кеңістіктен жиі ығыстырылып жатқанын, ал діни қауымдар мен медиа арасындағы диалогтың әлсіреп бара жатқанын атап өтті. Оның айтуынша, шектеулер мен тыйымдар ашық әңгімені алмастыра алмайды, тек өзара сенімсіздікті арттырады.

Талқылауға қатысқан журналистер "қоғаммен ашық әрі түсінікті байланыс орнату үшін діни ұйымдар өздері не істеп жатыр?" деген қарсы сұрақ қойды. Олардың пікірінше, диалог пен түсініктемелердің болмауы көбіне алып-қашпа сөздер мен қажетсіз дауларға себеп болады. Ал мұндай тақырыптар ашық әрі салмақты талқыланса, салдары да болмас еді.

Айнұр САПАРОВА

Автор түсірген суреттер мин видео

Бүгін, 12:12