Атыраулық отбасының мәселесін көтергенім үшін қоқан лоққы жасады Белгілі журналист сұхбат берді

Атыраулық отбасының ісін жария түрде көтерген жергілікті журналист Жанат Молдашова өзіне белгісіз адамдар тарапынан қоқан-лоққы жасалғанын айтты. Бұл туралы Alashorda.kz ақпараттық агенттігі хабарлады.

Журналистің сөзінше, ол Қызылқоға ауданына барған кезде мұндай жағдайға тап боламын деп күтпеген.

«Мен ауылға барғанда осындай сұмдыққа кезігемін деп ойламадым. Өзім ауылда өскен адаммын. Қызылқоға ауданы – Атырау облысындағы қазақы болмысы сақталған өңірлердің бірі. Ондай жерден мұндай қатігездік көремін деп мүлде күтпедім», – дейді ол.

Жанат Молдашованың айтуынша, болған оқиға оның жанына қатты батқан. Әсіресе, екі егде адамның мәйіті өз үйлеріндегі сарайдан табылғаны оған ауыр әсер еткен.

«Бұл жағдайды ішіме сақтап жүрдім. Алайда сол күні екі үлкен кісінің денесі табылғанын естігенде қатты күйзелдім. Қалаға әрең жеттік», – дейді журналист.

Осы оқиғадан кейін түнгі уақытта бейтаныс адамдардан қорқыту сипатындағы қоңыраулар түсе бастаған. Кейінірек түрлі мазмұндағы хабарламалар келген.

«Маған “сен ойнайтын ойыншық емессің, бұл істен шығып кет” деген секілді жазбалар келді», – дейді ол.

Журналист кәсіби қызметінде мұндай қысымға мойымауға тырысатынын, дегенмен бұл жағдайдың өзіне ауыр тигенін жасырмады.

«Журналист болған соң түрлі қылмыстық және әлеуметтік оқиғалардың ортасында жүреміз. Әлсіздік танытуға болмайды. Бірақ бұл жолы маған өте ауыр тиді», – деді Жанат Молдашова.