Петропавлда өзін зорлаған ер адамдарды ақтауға тырысқан қыз сотталды

Петропавлда өзіне қатысты зорлық-зомбылық жасаған екі ер адамды ақтауға тырысқан 21 жастағы қызға сот үкімі шықты, – деп хабарлайды Aikyn.kz сайты.

Іс материалдарына сәйкес, оқиға 2025 жылдың сәуірінде болған. Тергеу мәліметінше, төрт ер адам қызды пәтерде күштеп ұстап, олардың екеуі оған зорлық-зомбылық жасаған. Қыз кейін қашып шығып, полицияға хабарлаған және алғашқы жауабында күдіктілерді көрсеткен.

Бірақ кейін ол жауабын өзгертіп, оқиға өзара келісіммен болғанын айтып, арызынан бас тартуға әрекет жасаған. Тергеу барысында күдіктілердің бірінің туыстары мессенджердегі хат-хабарларды ұсынған. Онда айыптан бас тартқаны үшін 1,5 миллион теңге туралы сөз болған. Бірақ ақшаның нақты берілгені дәлелденбеген.

Сотта басқа дәлел ескеріліп, екі ер адам зорлық-зомбылық жасағаны үшін 9 жыл 6 айға бас бостандығынан айырылды.

Кейін қызға қатысты жалған айғақ беру бойынша іс қозғалды. Сотта ол кінәсін мойындап, ер адамдарға көмектескісі келгенін айтты.

Сот оған 5 жыл бас бостандығынан айыру жазасын тағайындады. Рақымшылыққа байланысты мерзім 3 жыл 4 айға қысқартылды. Алайда жаза шартты түрде белгіленіп, қыз колонияға жіберілген жоқ. Ол пробациялық бақылауға алынды.

Үкім әзірге заңды күшіне енген жоқ.