Қарағанды облысында кәмелетке толмаған қызды зорлаған ер адам 17 жылға сотталды

АСТАНА, 16 қазан — Sputnik. Қарағанды облысында кәмелетке толмаған қызды зорлаған 38 жастағы ер адам 17 жылға сотталды, деп хабарлайды Sputnik Қазақстан облыстық қылмыстық істер жөніндегі мамандандырылған ауданаралық сотының баспасөз қызметіне сілтеме жасап.

Сот материалына сәйкес, 2025 жылы ақпан айында Абай қаласында кәмелетке толмаған 2009 жылы туған жәбірленушіге анасы мен өгей әкесі 1987 жылы туған сотталушымен некеге тұруды ұсынған. "Күйеу жігіттің" жасын білген соң, кәмелетке толмаған қыз некеден бас тартқан.

"Өгей әке қыздың қарсылығына қарамастан 2025 жылдың наурызында оны сотталушымен бірге Қарағанды қаласына жіберген. Онда олар жалдамалы пәтерге тұрақтаған. Аталған пәтерде сотталушы жәбірленушінің жасының кәмелетке толмағанын анық біле тұра, оны зорлаған", - деп жазылған хабарламада.

Жәбірленуші тарап сотталушыға қатаң жаза қолдануды талап етті.

Сотталушының кінәсі жәбірленушінің, оның заңды өкілінің, куәлардың айғақтарымен, сараптама қорытындыларымен, іске қатысты тергеу әрекеттерінің нәтижелерімен және қылмыстық істің өзге де материалдарымен дәлелденді.

Іс бойынша жазаны жеңілдететін мән-жайлар анықталған жоқ.

Сот үкімімен сотталушы кінәлі деп танылып, оған 17 жыл мерзімге бас бостандығынан айыру жазасы кесілді. Оған өмір бойы педагогикалық лауазымдарда және кәмелетке толмағандармен жұмыс істеуге байланысты лауазымдарда қызмет атқаруға тыйым салынды.

Сот сондай-ақ прокурордың атына жәбірленушінің анасы мен өгей әкесінің әрекеттерінде қылмыс құрамының бар-жоғын тексеру үшін жеке қаулы шығарды.

Сот актілері заңды күшіне енген жоқ.