Полиция жау болғанда. Қазақстандық әйел алаяқтарға сеніп, құтқарушылардан қашты

Алматы облысының полициясы телефон алаяқтарына сеніп қалған әйелдің патрульдік полиция қызметкерлерінен қашып жүрген видеосын жариялады, деп хабарлайды Tengrinews.kz.

Алматы облысының полициясы телефон алаяқтарына сеніп қалған әйелдің патрульдік полиция қызметкерлерінен қашып жүрген видеосын жариялады, деп хабарлайды Tengrinews.kz.

Тұрғын алаяқтардың психологиялық қысымына түсіп қалған. Алдын ала мәлімет бойынша, ол қаскөйлерге SMS-кодты беріп үлгерген және олардың нұсқауларын орындап тұрған.

"Қылмыскерлер оны "құпия тергеу және түрмеге жабыласың" деп қорқытып, нағыз полицейлерді жау ретінде көруге мәжбүрлеген. Кадрлардан оның тұтқындалудан қорқып, үрейленіп патрульдік полициядан қашып бара жатқанын көруге болады, ал сол уақытта алаяқтар оның атына ірі көлемде несие рәсімдеуге тырысып жатқан", - делінген хабарламада.

Полиция қызметкерлерінің жедел әрекеті арқасында әйел алаяқтардың арбауынан құтқарылған. Осылайша, ықтимал қаржылық шығындардың алды алынды.

Құқық қорғау органдары алаяқтардың құрбанды өз мүдделеріне сай әрекет етуге мәжбүрлеу үшін жиі психологиялық қысым, қорқыту және манипуляция әдістер қолданатынын ескертеді.

Азаматтарды бөгде адамдарға SMS-кодтарды бермеуге, белгісіз тұлғалардың нұсқауларын орындамауға және қандай да бір күдік туындаған жағдайда полицияға хабарласуға шақырады.