Прокуратура талабына қарамастан, Атырауда мұғалімдерге 885 млн теңгеге пәтер сатып алынды

2025 жылдың маусымында прокуратура Атырау облысы білім басқармасы жариялаған қызметтік пәтерлерді сатып алу конкурсын тоқтатуды талап еткен еді. Алайда бұл талап орындалмай, сатып алу рәсімі аяқталған.

Атырау қаласы әкімдігі түсіндіргендей, мемлекеттік сатып алуды тек сот шешімімен ғана тоқтатуға болады. Бұл жағдайда сот шешімі болмағандықтан, конкурс заңды түрде жалғасқан.

Қазір өңірде білім басқармасының сатып алулары қоғамда қызу талқыланып жатыр. Әңгіме мұғалімдерге арналған қызметтік пәтерлер мен мектеп кабинеттерін жүздеген миллион теңгеге алу туралы болып отыр.

2025 жылы Атырау облысы білім басқармасы 23 қызметтік пәтер сатып алу үшін конкурс жариялады. Жалпы құны 885 миллион 200 мың теңге болды. Техникалық сипаттамада бір шаршы метрдің бағасы 450 мың теңге деп көрсетілген.

Атырау облысы әкімдігі бұл конкурстың өткізілгенін растады. Сонымен қатар, 2025 жылы білім басқармасы жалпы 81 пәтер сатып алғанын хабарлады. Ал 23 пәтерге арналған конкурс осы жалпы көлемнің бір бөлігі болғанын атап өтті.

Атырау облысы әкімдігі түсіндіргендей, білім басқармасының ережесінде педагогтардың әлеуметтік мәртебесін көтеру негізгі міндеттердің бірі болып көрсетілген. Осыған байланысты қызметтік пәтерлерді сатып алу туралы шешім қабылданған.

Облыстық биліктің дерегіне сүйенсек, бір бөлмелі пәтердің орташа бағасы 20–22 миллион теңге аралығында болған. Пәтерлерді сатып алу алдында нарықтағы жағдайға талдау жасалып, мемлекеттік органдардың талаптарына сәйкес бағалар қайта зерттелген.

Әкімдік сонымен қатар басқарманың пәтерлерді өз балансына қабылдаудан бас тартты деген ақпаратқа түсініктеме берді.

- Барлық сатып алынған пәтерлер Атырау облысы білім басқармасының балансында тұр және қазіргі уақытта педагогтарға жалға берілген. Атырау қаласының аумағындағы пәтерлерді аудандық білім бөлімдерінің балансына беру мүмкін емес. Бұған дейін Атырау қалалық білім бөліміне арнайы бағдарлама арқылы мұғалім тапшылығы бар өңірлерге тартылған педагогтарды қызметтік баспанамен қамтамасыз ету үшін пәтерлерді беру ұсынылған еді, алайда қалалық білім бөлімінің басшылығы бұл ұсыныстан бас тартқан, — деп түсіндірді әкімдік.

2024 жылы Атырау облысы білім басқармасы жалпы құны 603 миллион 200 мың теңге болатын 44 пәндік кабинет (химия, физика, технология) сатып алған. Әкімдік бұл сатып алулар «Аманат» партиясының сайлауалды бағдарламасы аясында жүзеге асырылғанын хабарлады.  

Бұған дейін жабдықтардың белгіленген тәртіппен қабылданбағаны туралы пікірлер айтылған еді. Алайда ресми жауапта кабинеттер техникалық сипаттамаға сәйкес сатып алынғаны және жеткізуші тарапынан тапсырыс берушіге қабылдау-тапсыру актілері негізінде берілгені көрсетілген.  

Облыстық әкімдікте атап өткендей, бүгінде барлық білім беру ұйымдары сатып алынған пәндік кабинеттерді қолданып отыр, мектеп тарапынан ешқандай шағым түспеген.

Сонымен қатар, қоғамдық ортада 2024–2025 жылдары интерактивті панельдер, пәндік кабинеттер және моноблоктарды бір ғана компания жеткізген деген пікірлер талқылануда. Ресми жауапта бұл ақпаратты нақты растамады да, жоққа шығармады да. Әкімдік тек мемлекеттік сатып алу заңнамасының нормаларына сілтеме жасаумен шектелді.

Айгүл МАНСУРОВА

Бүгін, 17:20