Қайсар Арена стадионына УЕФА ның IV санаты берілді

Фото: «Қайсар» ФК

11 мың көрерменге арналған спорт нысаны 2025 жылы салынған. Пайдалануға берілгеннен кейін стадион УЕФА лицензиялау рәсімінен өтіп, оның талаптарға сәйкестігін халықаралық сарапшылар бағалады.

Бұған дейін УЕФА-ның стадиондар жөніндегі инспекторы Скотт Стузерс Қызылордадағы «Қайсар Аренаға» жұмыс сапарымен келіп, тексеру жүргізген болатын. Санат беру туралы шешім инспекцияның толық есебі зерделенгеннен кейін қабылданды.

«Қайсар» стадионы УЕФА тарапынан жоғары бағаланды

IV санаттың берілуі «Қайсар Арена» стадионының УЕФА-ның халықаралық талаптарына толық сәйкес келетін заманауи спорт нысаны екенін білдіреді.

Енді стадион ресми жоғары деңгейдегі матчтарды, соның ішінде еурокубок ойындарын қабылдай алады. Бұл Қызылорда үшін футбол инфрақұрылымын дамыту мен өңірдің спорттық беделін арттыру жолындағы маңызды қадам саналады.

Осыған дейін Қазақстанда УЕФА-ның IV санатына тек екі стадион – Алматыдағы Орталық стадион мен елордадағы «Астана Арена» ие болған еді.

Виктор Мозес «Қайсарға» ауысты

Осылайша, УЕФА-ның IV санатының берілуі тек Қызылорда футболы үшін ғана емес, жалпы Қазақстанның спорт инфрақұрылымы үшін де маңызды оқиға болды. «Қайсар Арена» халықаралық деңгейде мойындалып, енді ірі футбол матчтарын өткізуге және өңірлік спортты дамытуға арналған жаңа алаңға айналмақ.