Қайтарылған активтер есебінен ауыл медицинасына ₸144 млрд бөлінді

Соңғы екі жылда қайтарылған активтер есебінен 144 млрд теңге медициналық нысандардың құрылысына жұмсалды. Ақтөбе облысы Қобда ауданына қарасты Бегалы елді мекенінде жаңа медициналық пункт пайдалануға берілді. Ғимараттың жалпы құны – 132 миллион теңге. Оның 65 миллион теңгесін Үкімет Арнаулы мемлекеттік қордан бөлді. Ауданы 150 шаршы метрден асатын жаңа орталық бір ауысымда 25 адамды қабылдай алады. Өңірде денсаулық сақтау саласын дамыту бойынша 11 жоба жүзеге асырылып жатыр.

Бүгінге дейін оның бесеуі аяқталды. Соңғы үш жылда ел аумағында 813 денсаулық сақтау нысаны бой көтерді. Оның басым бөлігі - алғашқы медициналық-санитарлық көмек ұйымдары. Нәтижесінде елде онкологиялық ауруларды ерте сатыда анықтау деңгейі жақсарды. Бұдан бөлек, 23 аудандық ауруханада инсульт орталықтары ашылды.

Жұлдыз Сабырова, дәрігер:

- 2019 жылы «Дипломмен ауылға» бағдарламасымен осы ауылға жұмысқа келдім. Бүгін біз үшін ерекше күн. Өйткені Бегалы медпункті ашылғалы отыр. Мұнда заманауи талапқа сай барлық медициналық құрал-жабдықтармен қамтамасыз етілген. Медициналық пункте алғашқы көмек көрсету, профилактикалық екпелер, жүкті әйелдер мен балаларға арналған алғашқы медициналық көмек көрсетіледі.

Оразбай Жотаев, ауыл тұрғыны:

- Керемет, талапқа сай, бұрынғыдай емес. Бәрі тамаша. Халық медпункті қабылдап алғалы отыр. Осындай игіліктер көбейе берсін.