Қарағай арасына дәрет сындырады : Көлсайда кәсіпкерлер тұрақсыз электр қуатына наразы

Sputnik.KZ парақшасынан алынған деректерге сүйене отырып, Qazaq24.com жаңалық жариялайды..

АСТАНА, 17 тамыз – Sputnik. Алматы облысы Кеген ауданындағы танымал туристік орын - Көлсай көлдерінде электр жарығы өте жиі өшеді. Бұл туралы Sputnik Қазақстанға кәсіпкерлер мен туристер айтты.

Аптасына 4-5 рет өшеді

Электр жарығы өшкен сайын интернет жұмыс істемейді. Уақытында салығын төлеп, қоқысын тазартып, таза ұстаймыз деген кәсіпкерлер демалыс орнында проблема шаш етектен дейді.

"Бізде басты проблема - электр жарығы. Былтырғы емес, биылғы жылды айтайын. Жаз басталғалы аптасына 4-5 рет электр өшеді. Аптасына 300 мың теңгеге балмұздақ аламыз, бірақ шығынға баттық. Еріп кетеді, сата алмаймыз. Сусындар жылып кетеді. Еттің бәрі сасып, бәрін тастауға тура келді", - дейді 25 жылдық тәжірибесі бар кәсіпкер Динара Томпақова.

Интернет те істемейді

Таңертең жасаған асымыз түсте сасып жатады деген кәсіпкерлердің айтар базынасы көп.

"Қатты қиналып жүрміз. Ауыл әкіміне ылғи айтамыз, "бір жыл шыдаңыздар" деумен келеді", - дейді кәсіпкерлер.

Көлсай көлдері

Көлсайдың түбінде орналасқан Саты ауылы. Кезінде 1000 үйге шақталып қойылған электр трансформаторы қазір қауқарсыз, күші жетпейді. Өйткені Көлсайға келетін турист көп, сәйкесінше жаппай бизнес ашып, ауыл үлкейіп кеткен.

"Қазіргі туристің 80%-ы каспимен сауда жасайды. Электр өшкенде интернет істемейді. Балалары жылап, қиналып тұрған соң, сата саламыз. Интернет ұстайтын жерге барғанда төлейтіні бар, төлемей де қоятыны бар", - дейді кәсіпкерлер.

Қарағай арасына дәрет сындырады

Электр жарығы өшкенде әжетханалардағы су да тоқтайды. Турист біткен қарағай арасын жағалап жүр, дейді тұрғындар.

"Мұнда екі әжетхана бар. Электр өшкенде екеуі де тоқтайды, есікті жабады. Туристер бізге келеді. Қонақ үйлер барлық туристерді әжетханаларына кіргізе бермейді. Олар Көлсайдағы ағаш-ағаштың арасына барады", - дейді көлсайлық кәсіпкерлер.

Көосайда жедел жәрдем шақыру да қиын. Аяқасты ауырған турист жан сауғалап көлік іздеп кетеді.

Көлсай көлдері

"Жедел жәрдем де шақыра алмаймыз. Қан қысымы көтеріліп ауыратын туристер жиі болады. Аллергиясы барлар қаншама. Өз көліктерімен кетеді, болмаса осындағы балаларға ауылға жеткізіңдерші деп жалынып, сосын салып жібереміз', - дейді кәсіпкерлер.

Жолды жабамыз!

Талай аппаратымыз күйіп кетті деген кәсіпкерлер мезі болғандарын айтады.

"Көктемнен бері осы проблема. Тамақ сасып, шіріп жатыр. Туристер ақшаны төлемей кетіп жатыр. Жарықтың киловатына 50 теңгеден төлеп жатырмыз. Бұл мәселе толық шешілмесе, осындағы кәсіпкерлер ереуілге шығып, турист кіргізбейміз. Жолды жабамыз, солай істемесек, басқа амал жоқ", - дейді Көлсайдағы кәсіпкерлер.

Sputnik Қазақстан тілшісі осы айиттылғандарға қатысты туристердің де пікірін сұрап көрді.

"Көлсайда жарық жоқ, тамақ ішкеннен кейін аударым жасайық десек, интернет жоқ. Дәретханаға барсақ, суы жоқ. Осымен 2-3 рет келдік, ылғи осындай жағдай. Кісілерден сұрасақ, тоқ көтермейді дейді. Қосымша подстанция қойып берсе", - дейді турист Нұрбол Анапияев.

Жатқаныма екі күн, электр жарығы әлі жоқ дейді тағы бір турист.

Көлсай көлдері

"Қаншама шетелдік келіп жатыр. Электр өшеді-жанады, өшеді-жанады. Атышулы Көлсайда осындай мәселе барын мен түсінбеймін. Бұған дейін де келгем, ол кезде де электр өшіп қалған. Боран, жауын, сол себепті электр жарығы өшті деп түсіндірген. Бүгін күн ашық, боран жоқ, бірақ электр жарығы жоқ. Бүгін таңнан бастап кешке дейін болған жоқ", - дейді демалушы Сымбат Канашев.

Электр қуатын мұнда әр кәсіпкер арнайы мотор арқылы қосады. Егер интернеті істесе, сағатына 5000 теңге төлеп, вайфайға қосылуға болады.

Әкімдік не дейді

Мәселенің мән-жайын Sputnik Қазақстан тілшісі Кеген аудандық әкімдігінен сұрап білді. Проблеманың бары рас, оны облыстық әкімдік те біліп отыр, дейді олар.

"Округ аумағында 40-қа жуық трансформаторлық қосалқы станция бар. Қазіргі уақытта Саты ауылдық округі аумағында 460 жеке абонент бар: оның ішінде 375 абонент І фазаға, қалған 92 абонент ІІІ фазаға қосылған. Жүктеме - 60 А, қуаттылығы 1 МВт көлемінде электр энергиясын пайдалануда.

Электр энергиясын тұтынатын заңды тұлғалар 13 абонент І фаза, қалған 55 абонент ІІІ фазаға қосылған. Ауылдық округ аумағына тартылған электр желілері мен бағаналары "Алатау Жарық Компаниясы" АҚ- ның теңгеріміне жатады", - дейді Кеген аудандық әкімдігі.

Электр мәселесін шешу үшін биылғы жылы жобалық-сметалық құжаттамаларды әзірлеуге қаражат бөлініп, жобалау жұмыстары басталған.

"Жобаға сәйкес, Кеген ауданының Жалағаш ауылында орналасқан "ПС 77И" қосалқы станциясынан Саты ауылына дейінгі шамамен 45 шақырымды құрайтын, қуаттылығы 6 МВт 35/10 кВ кернеулі әуе электр желісімен салу жоспарланған. Саты ауылына 4 МВт, Қайыңды көліне 1 МВт, Көлсай көлі аумағына 1 МВт. Бұл желі болашақтағы жүктеме өсімі ескеріле отырып жобаланып отыр", - дейді әкімдікте.

Саты ауылының шетінде трансформаторлық қосалқы станция салынады дейді олар. Бұл станция кернеуді 35 кВ-тан тұтынушыға арналған стандартты кернеуге төмендететін болады.

"Бұл жоба Саты ауылы мен оған жақын орналасқан Көлсай көлдері мен Қайыңды сияқты туристік аймақтардың электр энергиясына деген сұранысын толықтай қамтамасыз етеді. Жобалаушы мердігер – "ЭЛАЙ" ЖШС, келісімшарт былтыр шілдеде жасалды. Келісімшарт соммасы – 22,3 млн теңге, жоба биыл күзде аяқталады", - дейді Кеген аудандық әкімдігінде.

Көлсай көлдері

Жобалау кезінде Көлсай көлдері аумағында жаңа инвестициялық жоба болатыны анықталып, жұмыс көлемі ұлғаятын болды. Сол себепті жобалық-зерттеу жұмыстары қайтадан есептеліп, Алматы облысының энергетика басқармасына қосымша тағы 34 млн теңгеге бюджеттік өтінім жолданған.

"Жоба бойынша Жалағаш - Саты - Көлсай - 45 шақырым, Қайыңды көліне дейін 10 шақырым, 55 шақырым электр желілері тартылады. Орнатылатын трансформаторлардың саны мен қуаттылығы жобалау жұмыстары кезінде анықталады. Қазіргі уақытта Саты ауылының маңайына трансформаторлық станция орнатылатын орын анықталып, мемлекеттік акт жасалып жатыр және топографиялық түсірілімдерге толықтырулар жүргізіліп жатыр", - дейді Кеген ауданының әкімдігінде.

Жалпы Саты ауылдық округінде 1 178 адам тұрады. Округте қонақтарды қабылдайтын 105 үй және 200-ден аса қазақ үй бар. 2024 жылы ауданға 395 386 турист келген. Ал былтыр жарты жылда 249 528 турист демалған.

Оқиғаларды жіберіп алмау үшін Qazaq24.com сайтынан ең өзекті жаңалықтарды қарап отырыңыз.