2029 жылы электр қуатына тапшылық жойылады

2029 жылы электр энергиясы тапшылығы толығымен жойылады. Жауапты министрлік дайындаған кешенді жоспарда осындай мақсат қойылған. Жаңадан қосылатын станциялардың басым бөлігі жасыл энергетикаға негізделген.  Сонымен қатар саланы цифрландыруға да көңіл бөлініп келеді. 

2035 жылға дейін 26 гиговатт болатын жаңа энергия көздері іске қосылады. Жоспар бойынша қолданыстағы станцияларды жаңғырту арқылы 5 гиговатт, жаңа генераторлар салу арқылы 10 жарым гиговатт, жасыл энергия көздері арқылы 8,4 гиговатт қуат өндірілмек. Ал атом электр станциясы қосымша 2,4 гиговатт энергия береді. Былтыр қуаты  771 мегаватт болатын өндіріс орындары іске қосылды.

Аян Заманбеков, ҚР Энергетика министрлігі департаментінің бас сарапшысы:

- 2025 жылы 621 мв қуатын енгізу жоспарлануда. Оның ішінде 166 мегаваты дәстүрлі генерация болса, 455-і жаңартылған энергия көздері. Жалпы енді 29 жылға дейін профицитке шығу жоспарымызда бар. 

Бұл жобаларды қаржыландыру екі жолмен жүзеге асады. Біріншісі мемлекеттік сатып алу болса, екіншісі аукцион арқылы. Сонымен қатар саланы цифрландыруға да көңіл бөліне бастады.

Жақып Хайрушев, Қазақстанның еңбек сіңірген энергетигі:

- Цифрландыру арқасында өндірістің, жөндеу жұмыстарына дайындықтың, жөндеу жұмыстарының қалай жүріп жатқанын бақылап отыруға болады. Тіпті болуы ықтимал апаттардың да алдын алуға мүмкіндік береді. Ұлттық компаниялардың берген есептеріне қарап, бұл жұмыстар қолға алынғанын көріп отырмыз. Есепте қазіргі қолданыстағы станциялардың басым бөлігі цифрландырылғаны айтылған.

Ал салынып жатқан электр желілері мен өндіріс орындарында цифрландыру мәселелері қарастырылған. Яғни ірі инфрақұрылымдық жобаларда автоматты түрде есепке алу, тіркеуге арналған ехнологиялар қолданыла бастады.

Авторы: Серік Селеубайұлы