Қарағандыда полицейлер жоғалған бүлдіршінді жедел тапты

Мектепке дейінгі даярлық орталығына барып жүрген баласы белгісіз бағытқа кетіп қалғанын аңғарған ата-анасы алдымен өз беттерінше іздеу жүргізген.

Алайда нәтижесіз болғандықтан, олар Жедел басқару орталығына жүгінуге мәжбүр болды. Баланы іздеу жөніндегі ақпарат кинологтарға сағат 14:01-де жеткізілді.

Уақытты тиімді пайдаланған мамандар қызметтік ит Тайгамен бірге дереу іздестіру жұмыстарына кірісті.

Жедел әрі үйлесімді іс-қимылдың арқасында небәрі жарты сағат ішінде бала көршілес ауданнан аман-есен табылды.

Табылғаннан кейін баланы медицина қызметкерлері тексеріп, оның жағдайы жақсы екеніне көз жеткізді. Осыдан соң бүлдіршін ата-анасына тапсырылды.

Кинологтардың жедел әрекеті мен кәсіби шеберлігі ықтимал қайғылы жағдайдың алдын алып, баланы уақытында отбасына қайтаруға мүмкіндік берді.