Қарағандыдағы баланың өлімі: ДСМ ресми мәлімдеме жасады

Ведомствоның мәліметінше, тексеру барысында балада бактериялық, вирустық және саңырауқұлақ текті қоздырғыштардың болуымен аралас инфекцияға байланысты аса ауыр жағдай анықталды.

— Ауру ағымы айқын иммун тапшылығымен, сондай-ақ туғаннан бастап вакцинациялаудың болмауымен асқынған, бұл ағзаның инфекцияға қарсы тұру мүмкіндігін едәуір шектеп, жүргізілген емнің тиімділігін төмендеткен. Медициналық көмек қолданыстағы клиникалық хаттамаларға сәйкес толық көлемде көрсетілді, — дейді ақ халаттылар.

Олардың айтуынша, емдеу тәсілі бірнеше рет республикалық консилиумдардың шеңберінде, салалық мамандардың, соның ішінде штаттан тыс бас балалар инфекционисті, бас балалар пульмонологі, бас балалар реаниматологінің қатысуымен қаралды.

— Қосымша түрде экстракорпоральдық мембраналық оксигенацияны (ЭКМО) қолдану мүмкіндігі де қарастырылды. Алайда консилиумның қорытындысы бойынша, жағдайдың ауырлығын және медициналық көрсетілімдерді ескере отырып, бұл әдіс ұсынылмады. Қарқынды терапия жүргізіліп, барлық қажетті шара қабылданғанына қарамастан, баланы аман алып қалу мүмкін болмады. Мұндай жағдайлар медициналық тұрғыдан аса күрделі сипатта болатынын айта кету қажет. Ауыр инфекция, иммун тапшылығы және вакцинациялаудың болмауының үйлесуі ем уақытылы әрі толық көлемде жүргізілгеннің өзінде де қолайсыз нәтижеге әкелу қаупін едәуір арттырады, — делінген хабарламада.

Министрлік аталған факт бойынша көрсетілген медициналық көмекті объективті бағалау үшін тәуелсіз сарапшыларды тарта отырып, жан-жақты тексеру жүргізілетінін хабарлайды.

— Бұқаралық ақпарат құралдарының өкілдерін, блогерлерді және қоғамды тек тексерілген әрі ресми ақпарат көздеріне сүйенуге, асығыс қорытынды жасамауға және расталмаған деректерді таратудан бас тартуға шақырамыз. Денсаулық сақтау министрлігі баланың қайтыс болуына байланысты оның туған-туыстары мен жақындарына шын жүректен көңіл айтады, — деп атап өтті ведомствоның баспасөз қызметі.

Осыған дейін БҚО-да ауруханаға ауыр жағдайда түскен бала көз жұмғанын жазғанбыз.