Қарағандыдағы отбасылық жанжал және әйел өлімі: туыстары мен полиция не дейді

2025 жылдың шілдесінде Қарағандыда 28 жастағы Динара Мыңбаева қайтыс болды. Өлім алдында ол туыстарына қоңырау шалып, өзін күйеуінен алып кетуді өтінген және отбасылық жанжалдан кейін полицияға жүгінген. Динараның туыстары оқиғаның барлық мән-жайын анықтауды сұрап отыр, деп хабарлайды Tengrinews.kz тілшісі.

Қарағанды облысы полиция департаменті Динараның қаза табарының алдында отбасылық-тұрмыстық жанжалдан кейін құқық қорғау органдарына жүгінгенін растады. Сонымен бірге, ведомство бұл оның жұбайына қатысты полицияға жасаған алғашқы арызы екенін хабарлады.

"Мені мына жерден алып кетіңіздерші"

Бұл сөздерді Динара Мыңбаева өлімінен сәл бұрын туыстарына айтқан. Әйел 2025 жылдың 3 шілдесінде көз жұмды, оның артында екі кішкентай ұлы қалды. Туыстарының айтуынша, кейінгі жылдары Динараның отбасында жанжалдар, соның ішінде тұрмыстық зорлық-зомбылық оқиғалары орын алған. Қазір жақындары оның өлімінің мән-жайын толық тергеуді талап етіп жатыр.

Полиция не дейді?

Қарағанды облысы полиция департаментінің баспасөз қызметі қайғылы оқиға алдында ерлі-зайыпты арасында отбасылық-тұрмыстық жанжал болғанын хабарлады. Әйел полицияға жүгінген, содан кейін оның күйеуі бөлімшеге жеткізілген. Бұл аталған отбасынан тұрмыстық жанжал бойынша түскен алғашқы шақырту болған.

"Ер адамға қатысты әкімшілік материал толтырылды. Динара Мыңбаева бұған дейін отбасылық жанжалдар бойынша полицияға бірнеше рет жүгінген деген ақпарат шындыққа жанаспайды. Одан жұбайына қатысты бұрын-соңды арыз-шағымдар түспеген", - деп атап өтті ПД өкілдері.

Қарағанды облысы ПД баспасөз қызметі ақпаратынша, ер адам тұрғылықты жеріне оралмай, Абай қаласына кеткен.

"Ол тұрғылықты жеріне оралмастан, Абай қаласына бет алған. Онда таң атқанша болған. Оның аталған кезеңдегі жүрген жері тергеу барысында анықталып, расталды", - деп толықтырды Қарағанды облысы ПД баспасөз қызметі.

Сонымен қатар, оған қатысты іс тоқтатылған жоқ. Материалдар сотқа жолданып, сот Динара Мыңбаеваның күйеуін әкімшілік жауапкершілікке тартты.

Анықтама: Ұстау кезінде полиция ӘҚБтК-нің оның негіздерін, тәртібі мен мерзімдерін айқындайтын 785, 787–789-баптарын басшылыққа алады. Жалпы тәртіп бойынша әкімшілік ұстау мерзімі үш сағаттан аспауы тиіс.

Қазіргі уақытта бұл іс бойынша тергеу амалдары жалғасып жатыр.

Аталған дерек бойынша "Өзін-өзі өлтіруге дейін жеткізу" бабы (Қылмыстық кодекстің 105-бабы) бойынша сотқа дейінгі тергеу жүргізіліп жатыр. Тергеу оқиғаның барлық мән-жайын, соның ішінде әйелдің өліміне дейін болған жағдайларды тексеріп жатыр. Марқұмның денесінен жарақаттар табылмаған.

Суретте марқұм Динара Мыңбаева. Фотоны туыстары ұсынды

Сонымен қатар Динараның әпкесі Әсел Тұрдықұлова Tengrinews.kz тілшісіне әйелдің өмірінің соңғы сағаттары мен отбасы әлі жауабын таба алмаған сұрақтар туралы айтып берді.

Динара 2020 жылы тұрмысқа шыққан. Ал екі жылдан кейін жұбайымен бірге Сарыағаштан Қарағандыға көшіп келген. Ерлі-зайыптының екі ұлы бар, қазір үлкені төртте, кішісі екі жарым жас шамасында.

Әселдің айтуынша, сіңлісінің отбасындағы мәселелер бірден басталмаған. Туыстарына белгілі болған алғашқы қол көтеру оқиғасы шамамен 2024 жылы болған.

"Кезекті бір жанжалдан кейін Динара әкесіне қоңырау шалып, оны алып кетуді өтінді. Әкем Шымкенттен Қарағандыға келді. Бір айға жуық ол ата-анасының үйінде болды. Ата-анам оны жұбайына қайтарғысы келмеді. Алайда кейінірек Динараның күйеуі келіп, кешірім сұрап, енді оған қол көтермеуге уәде берді. Динара оған сеніп, қайтып барды", - деді Әсел Тұрдықұлова.

"Бәрі өзгереді деп үміттенді"

Әпкесінің айтуынша, жағдай қайталанған. 2025 жылдың көктемінде, Динараның өлімінен шамамен үш ай бұрын Әсел Қарағандыға келіп, сіңлісінің жылап отырғанын көрген.

"Ол маған: "Мені бұл жерден алып кетіңіздерші" деді. Біз сол кезде күйеуімен сөйлестік, ол бәрін түсінгендей болды. Кейін отбасындағы қарым-қатынас түзелгендей көрінді. Жанжалдардың жалғасып жатқанын тіпті білмедік те", - деп еске алады әйел.

Соңғы қоңыраулар

Өткен жылдың 2 шілдесінде кешке Динара анасына қайта қоңырау шалып, өзін алып кетуді сұраған. Ата-анасы ертеңіне жолға шығатындарын айтып уәде берген. Бірақ келесі күні оның асылып тұрған жерінен табылғанын естіген.

"Сол түні ол тек ата-анасына емес, соққыға жығылғанын айтып полицияға да хабарласқан. Полиция келіп, күйеуін алып кеткен, бірақ белгісіз себептермен екі сағаттан кейін босатып жіберген. Осыдан кейін ол үйге келіп, жанжал жалғасты ма деп болжаймыз. Күйеуінің айтуынша, Динара таңғы сағат 9-дар шамасында асылған. Ал бізге бұл туралы тек түстен кейін хабарлады. Полиция мен жедел жәрдемге де хабар бірден түспеген. Біз оның өмірінің соңғы сағаттарындағы оқиғалар тізбегін қалпына келтіріп, нақты не болғанын анықтауға тырысып жатырмыз", - дейді марқұмның әпкесі Әсел Тұрдықұлова.

Әселдің айтуынша, сіңлісі қайтыс болғаннан кейін туыстары оның бетінен, басынан, мойнынан және құлақ маңынан ісіктер мен гематомаға ұқсас дақтарды байқаған. Отбасы бұл өзгерістердің немен байланысты болуы мүмкін екенін анықтағысы келеді.

Туыстары тергеуге фотосуреттерді, хаттарды және сөйлесулердің бірінің аудиожазбасын ұсынуға дайын. Қазір олар тергеу барысы туралы ақпарат күтіп отыр.

Өңірлік полиция өлімнің себептері туралы түпкілікті қорытынды тергеу аяқталғаннан кейін жасалатынын атап өтті. Ведомство БАҚ пен әлеуметтік желі пайдаланушыларын тексерілмеген ақпаратты таратпауға және тергеу аяқталғанға дейін асығыс тұжырым жасамауға шақырды.

Бізді Google-дың негізгі дереккөздер тізіміне қосыңыз

Қосу