Қарағандылық кәсіпорын бие сүтінің өнімдерін АҚШ қа экспорттап жатыр

Қарағандыдағы «Саумал Биотех» кәсіпорын былтырдан бері компания 200 кг бие сүті өнімін АҚШ-қа экспорттаған, қазір Қытаймен әріптестік орнату үстінде. Бұл туралы Орталық коммуникациялар қызметінде өткен брифингте Облыс әкімі Ермағанбет Бөлекпаев мәдімдеді, - деп хабарлайды Aikyn.kz.

Өңір басшысының айтуынша, былтырдан бері егіс алқаптарының көлемі екі есе артып, бір ғана майлы дақылдар алқаптарының аумағы биыл 43,1 мың гектарға жеткен. 

- Мысалы, қазірдің өзінде Нұра ауданында жылына 9 мың тонна сүт өндіретін ферма ашылған. Ал Бұқар жырау ауданында жылына 200 тонна сүт өңдейтін зауыт іске қосылды. Осакаров ауданында салынып жатқан сүт фермасы жылына 55 мың тонна сүт өндіруге мүмкіндік береді. Қазірдің өзінде экспортқа шыға бастаған қарағандылық сүт өнімдері бар. Бие мен түйе сүтінен қоспа шығаратын «Саумал Биотех» кәсіпорны былтырдан бері компания 200 кг бие сүті өнімін АҚШ-қа экспорттаған, қазір Қытаймен әріптестік орнату үстінде.

Мұның бәрі – ауыл шаруашылығын дамытуға ден қойып, бұл салаға арналған инвестицияны екі есе арттырудың жемісі. Биыл агроөндіріске 44 млрд. теңге салынған. Алдағы уақытта 47 млрд теңгеге 31 жобаны іске қосу жоспарланып отыр. Жаңа жұмыс орындарын ашу, нарықты отандық өнімдермен қамтамасыз етумен қатар азық-түлік бағасын өсірмей ұстап тұруға да көңіл бөлінеді, - деді Облыс әкімі Ермағанбет Бөлекпаев.

Тағы бір жаңалық – әкім фермерлер өндірген өнімін өздері сататын әлеуметтік павильондар ашылып жатыр.  Мұндай павильондар араға делдал салмай-ақ өндіруші мен тұтынушы тікелей сауда жасайтын орынға айналады.

-«Қалауын тапса, қар жанар». Қарағандылық агроөнімдер «Made in Qazaqstan» брендін басқа елдерге таныта бастады, қажырлы еңбек пен нақты қолдаудың арқасында халықаралық нарықта ойып тұрып орын алатын күн алыс емес, - дейді ол.