Қарағандылық полицейлер ұрыларды ұстады

Қарағанды облысында полицейлер 45 бас жылқы тиелген жүк көлігін тоқтатты.

Тексеру кезінде 27 бас түліктің өзге адамға тиесілі екені анықталды. «Камаз» көлігін Түркістан облысының 48 жастағы тұрғыны жүргізіп келе жатқан. Ол жылқыларды Степногорск қаласының тұрғынынан 13,5 млн теңгеге сатып алдым деп түсіндірген. Бірақ оны дәлелдейтін ешбір құжаты болмай шықты. Полиция қызметкерлері малдың нақты иелерін анықтау үшін бейнетаспаға түсіріп, шаруа қожалықтарының әлеуметтік желідегі чаттарына жолдайды. Ал бөтен көлікке тиелген өз жылқыларын таныған мал иесі бірден полицияға хабарласыпты.

Мейіржан Сламбеков, облыстық ПД Басқармасы бастығының орынбасары:

- Ақмола облысының 54 жастағы тұрғыны бейнематериалдағы жылқылардың арасынан еркін жайылымнан ұрланған  өзіне тиесілі 27 жылқысын таныған.  Аталған дерек бойынша қылмыстық іс қозғалып, сотқа дейінгі тергеу амалдары жүргізілуде.