Қарағандылық полицейлер қалааралық жолдарда жазғы дөңгелегін ауыстырмаған жүргізушілерді кері қайтарып жатыр

Ауа температурасының күрт төмендеуі мен жаңбыр аралас қардың түсуіне байланысты Қарағанды облыстық полиция департаментінің патрульдік полиция батальоны күшейтілген қызмет режиміне көшті. Бұл шаралар жол қозғалысына қатысушылардың қауіпсіздігін қамтамасыз етуге, облыстық және республикалық маңызы бар трассаларда апатты жағдайлардың алдын алуға бағытталған.

Жолдағы бақылауды күшейту үшін полиция экипаждар саны арттырылды. Бүгін республикалық маңызы бар трассаларға 26 автопатруль мен 55 полиция қызметкері жұмылдырылған. Олар жүргізушілермен профилактикалық әңгіме жүргізіп, жылдамдық режимін сақтау, арақашықтықты сақтау және көліктердің техникалық жағдайын қысқы маусымда қадағалау қажеттігін еске салып жатыр.

Ерекше назар Қарағанды — Астана тас жолына аударылды. Мұнда патрульдік полиция қызметкерлері көліктердің қысқы дөңгелекке ауыстырылған-ауысырылмағанын тексеріп жатыр. Қарағанды облыстық полиция департаменті патрульдік полиция батальонының командирі Медет Нұрмұхановтың айтуынша, бүгін шамамен 30 жүргізуші жазғы шиналармен жүргені үшін жолға шығарылмаған.

— Жол қозғалысы қауіпсіздігін қамтамасыз ету мақсатында қысқы шиналармен жабдықталмаған көліктердің жолға шығуын уақытша шектеп отырмыз. Бұл — формальды шара емес, жүргізушілер мен жолаушылардың өмірі мен денсаулығын сақтау үшін қабылданған нақты шешім. Егер кеше жаңбыр жауған болса, бүгін ауа температурасы –14 градусқа дейін төмендеп, кейбір учаскелерде көктайғақ болды. Барлық жүргізушілерден түсіністікпен қарауды сұраймыз, — деп атап өтті Медет Нұрмұханов.

Бүгіннің өзінде облыс орталығында 50-ге жуық ұсақ жол-көлік оқиғасы тіркелген. Негізгі себептері — жылдамдық режимін және арақашықтықты сақтамау, сондай-ақ жазғы шинамен жүру. Абырой болғанда, зардап шеккендер жоқ.

Полиция департаменті жүргізушілерге ауа райы жағдайын ескеріп, жолда мұқият болуға және аса қажетсіз жағдайда сапарға шықпауға кеңес береді.

Еске салсақ, 4 қараша күні еліміздің бірқатар өңірінде ауа райының нашарлауына байланысты жүргізушілерге жолда абай болу ескертілді.