Қазақ әмірлік қатынасы қарқынды дамыды

Биыл Астана мен Абу Даби арасындағы саяси-экономикалық қатынастар тың серпін алды.

Жыл басынан бері екі елдің ресми делегациялары мен бизнес құрылымдары түрлі деңгейде келіссөз жүргізіп, іскерлік кеңестер өткізді. Ең әуелі қаңтарда мемлекет басшысы Абу Дабиге сапарлады. Ол кезде Қасым-Жомарт Тоқаев әмірліктер басшысы Шейх Мұхамед бен Заид Әл-Нахаянмен кездесіп, кейін Абу Даби тұрақтылық апталығында сөз сөйледі. Өз баяндамасында президент әлемдегі азық-түлік қауіпсіздігі, экология, су жетіспеушілігі және құрғақшылық мәселелерін қаузады. Араға уақыт салып, Абу Дабидің тақ мұрагері Шейх Халед бен Зайед Әл-Нахаян Астанаға келді. Сөйтіп жалпы құны 5 млрд долларлық жобаларға қол қойылды. Мұндай деңгейдегі байланыс жергілікті сарапшылар назарын аудармай қоймады.

Бабак Ахмадзада, Инвестициялық компанияның бас директоры:

- Қазақстан мен Біріккен Араб Әмірліктерін жақындастыратын басты фактор - мықты көшбасшылық пен бірлесіп жұмыс істеуге деген шынайы ниет. Қазір екі елдің көшбасшылары бір-бірімен тұрақты байланыста әрі арнайы сапарларды жиі жасап тұрады. Осының арқасында қос тараптың жаңартылатын энергия, қаржы қызметтері және инфрақұрылым салаларында әріптестігі қарқынды дамып келеді.

Екі жақты ынтымақтастықты ілгерілетуге бизнес құрылымдар үлес қосып келеді. Әмірлік жерінде өткен бірнеше маңызды форумға біздің ел тарапы ауқымды делегация болып қатысып, оң тәжірибе жинады. Ал сауда-саттық пен ннвестиция саласында бұрын-соңды болмаған көрсеткіштер тіркелді. Айталық, осы жылы қазақстандық бидайдың алғашқы партиясы Дубайға жеткізілді. Ал әмірліктен Қазақстанға тартылған тікелей инвестиция 1 млрд доллар жетті.