Қазақ ертегілері украин тілінде жарық көрді

Бүгін Украина астанасы - Киев қаласында Қазақстан Республикасы күніне орай украин тілінде жарық көрген «Ұлы Даланың сиқырлы аңыздары» атты қазақ ертегілері жинағының тұсаукесері өтті. Бұл туралы Украинадағы Қазақстан Елшілігі хабарлады.

Мәдени шара Қазақстан Республикасының Елшілігімен Тарас Шевченко атындағы Киевтік орталық саябағы аумағындағы қазақ киіз үйінде Украина Жоғарғы Радасы депутаттарының, Жамбыл Жабаев атындағы Киевтік қоғамдық кітапханасының, «Аналар үйі» басшылығының және бірқатар ерікті балалар ұйымдарының, сондай-ақ қазақ диаспорасы өкілдерінің, жас оқырмандар мен ата-аналарының қатысуымен ұйымдастырылды.

Айтулы оқиға барысында аниматорлардың көрсетілімдері, байқаулар мен шеберлік сыныптары өткізілді.

Қазақстан Республикасының Елшісі Төлежан Барлыбаев жаңа кітапты көпшілікке таныстыра отырып, қазақ ауызша фольклорының көркемдік құндылығын, оның жанрлық алуан түрлілігі мен тілдік байлығына тоқталды.

Ежелгі ертегілеріміздегі ғасырлар бойы қалыптасқан халық даналығы мен ал оны білу жас украиналық оқырмандарға қазақтың салт-дәстүрлері мен әдет-ғұрыптарын тереңірек білуге мүмкіндік беретіні тілге тиек болды.

Осы орайда Тарас Шевченконың шығармашылық мұрасына бағышталған мәдени байланыстарды нығайтудың маңыздылығын атап өтіп, дипломат оның туғанына 212 жыл толуына орай Ұлы Кобзарь шығармашылығының қазақ кезеңі жөнінде суреттелген монография басылымға дайындалып жатқанын хабарлады.

Украинаның халық депутаты Сергей Нагорняк қазақстандықтарды Республика күнімен құттықтады және Қазақстанның ұлттық мерекесіне орай ізгі тілектерін білдірді. Парламент мүшесі екі ел халықтарының дәстүрлі достық қарым-қатынастары мен екіжақты ынтымақтастықты дамыту болашағына жоғары баға берді. Ол Украинадан балалар тобы үшін қазақстандық «Балдәурен» оқу-сауықтыру орталығына жазғы қайырымдылық турын ұйымдастыруға көмектескені үшін Қазақстан тарапына алғысын білдірді.

Жамбыл Жабаев атындағы кітапханасының, «Аналар үйі», қоғамдық балалар ұйымдары мен қазақ диаспорасының өкілдері ертегілер кітабын Украинадағы кітапханаларына тапсырғаны үшін шынайы алғыстарын білдірді.

Көркем суреттері бар, ұлттық бояумен толтырылған қазақтың дәстүрлі ертегілерінің көлемді жинағы (256 бет) украин балаларының үлкен қызығушылығын тудыратыны баса айтылды. Мәдени акцияның барлық жас қатысушылары ертегілер кітабын сыйлыққа алды.

«Ұлы Даланың сиқырлы аңыздары» жинағына 38 ертегі – «Алпамыс», «Алдар-көсе», «Абат батыр», «Күнікей сұлу», «Ер Төстік», «Әуез ханның қырық ұлы», «Жігіт пен қасқыр» және тағы басқалары кірді. 2,5 мың даналық таралыммен кітап Украина кітапханалары мен мектептерге, балалар үйлері мен басқа да әлеуметтік мекемелерге таратылмақ.