Өзбекстанда қазақ қаламгерлерінің кітаптары жарық көрді

Өзбекстандағы қазақ қаламгерлері үшін биылғы жыл табысты болды. Қандастарымыздың түрлі жанрда 20-ға жуық кітабы жарық көрді.

Олардың көркемдік мазмұны негізінен аудармаға бағытталған. Ұлы Абайдың 180 жылдығы ел көлемінде кеңінен атап өтілді. Ойшылдың бірнеше кітабы өзбекшеге аударылып, мектептер мен жоғары оқу орындарына тегін таратылды.

Қазақ кітаптарының негізгі оқырмандары мектеп оқушылары. Қандастар көп шоғырланған Ташкент пен Науаи облыстарынан бөлек, Қарақалпақстанда да қазақ жазушыларының шығармалары сұранысқа ие. Ал Ұлы Абайдың 180 жылдығына кемеңгердің бірнеше кітабы өзбек тілінде жарыққа шықты.   

Серікбай Үсенов, Қазақ ұлттық-әдеби орталығының төрағасы:

- Абайдың 180 жылдығында атамыздың кітабын өзбек тіліне аударып, оны өзбек мектептеріне тараттық. Оны өзбек сыныбында оқитын балалар білсін дедік.

Өзбекстанда қазақ қаламгерлерінің жалпы саны 60-қа жуықтайды. Биыл түрлі жанрда 20-ға жуық кітап шыққан. Авторлар көбіне туған жер, естеліктер мен балалар шығармасына қалам тербейді. Жергілікті ақын жазушылар Қазақстандағы әріптестерімен үнемі байланыста.

Тұрсынәлі Ахметов, Өзбекстан Жазушылар одағы қазақ әдебиеті кеңесінің төрағасы:

- Отандастар қоры арнайы бағдарлама жариялап соның аясында біздің ақын жазушылар кітап шығарды. Оны қаңтар айында таныстаратын боламыз.

2026 жылы жарыққа шығатын шығармалардың мазмұны мен қаржыландыру тетіктері қазір қарастырылып жатыр. Жас ақын жазушыларды қолдау тақырыбы да назардан тыс қалмайды.