Қазақ өнерпаздары Париж сахнасында

Парижде «Франциядағы Қазақстанның күзі» атты мәдени жоба жалғасуда. Француздар қазақ халқының бай өнері мен рухани мұрасын жақынырақ танып келеді.

Жобаның кезекті жарқын сәті – 17-ші аудан мэриясының сахнасында өткен «Birlik» би ансамблінің және қобызшы Ғазиза Ғабдрахимованың концерті мен ЮНЕСКО штаб-пәтерінде өткен шеберлік сабағы болды. 

Еліміздің бірінші көпұлтты «Birlik» би ансамблі Париждің ең әсем аудандарының сахнасында. Бұл мәдени көпір Елшіліктің «Казақстанның Франциядағы күзі» жобасы аясында Мәдениет және ақпарат министрлігі мен «QazElles» атты Франциядағы қазақстандық әйелдер қауымдастығының қолдауымен жүзеге асты.

Әнел Марабаева, «Birlik» ансамблінің көркемдік жетекшісі:

- Біздің ұжым өте жас, бар болғаны 1,5 жыл бұрын құрылды. Осы уақытта біз әлемнің 15-ке жуық халқының билерін дайындадық. Біз Қазақстан халқы Ассамблеясының өкілдеріміз, басты мақсатымыз – мәдениеттерді жақындастыру. Көрермен әр нөмірімізді өте жылы қабылдады. Бұл біз үшін үлкен бақыт.

Француз көрерменіне ансамбль өз репертуарындағы үздік билерін ұсынды: «Күй шашу», «Балбырауын», «Қара жорға», сондай-ақ аты аңызға айналған биші Шара Жиенқұловаға арналған «Шара» биі. Бұдан бөлек, өзбек, тәжік, татар, түрікмен және үнді халықтарының ұлттық билері орындалды. Көрермендер ерекше қызығушылықпен қобыз үніне құлақ түрді.

Ғазиза Ғабдрахимова, музыкант, Тhe Мagic of Nomads тобының жетекшісі:

- Музыкант ретінде қазақтың өнерін насихаттауға, дәріптеуге әр қашан дайынмын. Оны тыңдап жатқан көрермен неғұрлым көп болса, со ғұрлы мен де бақыттымын. Көрермен өте жақсы қарсы алды. Қобыздың үнін басқа еш аспаппен салыстыра алмайтын сияқтымын. Сол себепті ұйып тындады. Келешекте олардың қазақ өнеріне қызығулышығы одан да артады деп сенемін.

17-ші ауданның тұрғындары қазақстандық мәдени бастамалардан хабардар. Бұған дейін жергілікті Ваграм алаңында шымкенттің қызғалдақтары егілсе, енді париждіктер қазақтың әуезді әнін тыңдап, ұлттық бидің қимылын бірге қайталап, оның мән-мағынасын сезінді.

Аньес, көрермен:

- Жас бишілер өз мәдениетінің тамырын жеткізе білді. Бізге олардың қимылдарын қайталап көруге мүмкіндік берді, әр символдың мағынасын түсіндірді. Бұл – мәдениеттердің байлығы мен өзара түсіністігін көрсететін тамаша тәжірибе.

Насрин, көрермен:               

- Концерт әдемі болды. Әсіресе жарқын түстер мен костюмдер ерекше әсер қалдырды. Мен Иранда дүниеге келгенмін, сондықтан бұл маған өте жақын әрі жылы көрінді.

Қазақ мәдениетімен танысу ЮНЕСКО штаб-пәтерінде жалғасын тапты. Мұнда қазақстандық өнер қайраткерлері бірегей шеберлік сабағын өткізді. Ғазиза Ғабдрахимова қобыздың тарихы мен түркі халықтарының аспаптары туралы, сондай-ақ Қорқыт ата мұрасы жайында әңгімеледі. Ал хореограф Анель Марабаева қазақ биі арқылы төрт табиғи стихия - от, су, жер мен ауаның үйлесімін көрсетті. Осылайша, Франция жұртшылығы тағы бір мәрте қазақ мәдениетінің тереңдігі мен сұлулығына куә болды.

Авторлары: Айдана Айтбекқызы, Руслан Өміржан