Nvidia ның жаңа чиптері ChatGPT дің жауап беру жылдамдығын өсіреді

Reuters агенттігінің хабарламасына сүйенген Aikyn.kz ескі чиптерге OpenAI-дің неге көңілі толмайтынын түсіндіреді.

Wall Street Journal жұма күні (27 ақпан) Nvidia компаниясы ЖИ жүйелерін жылдамырақ әрі тиімдірек құруға көмектесетін жаңа процессор шығаруды жоспарлап отырғанын хабарлады. Мәліметке сәйкес, Nvidia «инференс есептеулеріне» арналған жаңа жүйе әзірлеуде. Бұл – ЖИ модельдерінің пайдаланушының сұрауларына жауап беруін тиімді өңдеу түрі.

Хабарламада айтылғандай, жаңа платформа келесі айда Сан-Хоседе өтетін Nvidia-ның GTC әзірлеушілер конференциясында таныстырылады және оның құрамына Groq стартапы жасаған чип кіреді.

Осы айдың басында OpenAI компаниясы бағдарламалық қамтамасыз етуді әзірлеу және ЖИ-дің басқа бағдарламалармен өзара әрекеттесуі секілді бағыттарда Nvidia жабдығының ChatGPT пайдаланушыларына жауап беру жылдамдығына көңілі толмайтынын хабарлаған болатын.

Дереккөздердің бірінің айтуынша, болашақта OpenAI-дың инференс саласындағы есептеу қажеттілігінің шамамен 10%-ын қамтамасыз ете алатын жаңа жабдық қажет болады. Осыған байланысты ChatGPT-ті есептеу қуатымен қамтамасыз етіп отырған Nvidia деректерді тезірек өңдейтін чиптерді жасау үшін Cerebras және Groq секілді стартаптармен әріптестік орнатқысы келеді.

Алайда Reuters-ке пікір білдірген бір дереккөздің айтуынша, Nvidia-ның Groq-пен жасасқан 20 млрд долларлық лицензиялық келісімі OpenAI-мен жүргізілген келіссөздердің үзілуіне себеп болған.

Қыркүйек айында Nvidia OpenAI-ға 100 млрд долларға дейін инвестиция салуға ниетті екенін мәлімдеген. Бұл келісім бойынша чип өндіруші стартапта үлес алса, OpenAI озық чиптер сатып алуға қажетті қаражатқа ие болады.