Қазақстан 2030 жылға қарай парниктік газ шығарындыларын 15% ға қысқартуды көздейді

Жиынға Еуропалық одақ өкілдері мен Орталық Азия елдерінің салалық министрлері қатысты. Сарапшылардың айтуынша, өңір климат өзгерісіне ең осал аймақтардың бірі. Халықаралық бағалауларға сәйкес, ғасыр соңына қарай ауа температурасы 4–6 градусқа дейін көтерілуі мүмкін. Бұл мұздықтарға, су ресурстарына, ауыл шаруашылығына және миллиондаған адамның тұрмысына тікелей әсер етеді.

Осы жағдайды ескерген Қазақстан климат саясатын күшейтіп, парниктік газ шығарындыларын азайтуды негізгі басымдықтардың бірі ретінде айқындап отыр.

Ел 2060 жылға дейін көміртегі бейтараптығына қол жеткізу стратегиясын бекітті. Соған сәйкес, 2030 жылға қарай шығарындыларды 15%-ға қысқарту жоспарланған. Ал халықаралық қолдау болған жағдайда бұл көрсеткішті 25%-ға дейін жеткізу көзделген.

ҚР Экология және табиғи ресурстар вице-министрі Нұрлан Құрмалаевтың айтуынша, 2025 жылдың желтоқсанында 2026–2035 жылдарға арналған жаңартылған ұлттық үлес бекітілген. Құжат 1990 жылғы деңгеймен салыстырғанда шығарындыларды 17%-ға азайтуды қарастырады.

– Біз үшін деректердің ашық әрі салыстыруға келетін болуы маңызды. Қазақстан – энергия ресурстарын экспорттайтын ел, сондықтан бұл мәселе стратегиялық мәнге ие. Әсіресе Еуропалық одақтың жаңа климаттық талаптары, оның ішінде энергетика саласындағы метан шығарындыларын реттеу мәселесі өзекті, - деді ол.

Сонымен қатар, Қазақстан метан шығарындыларын реттеу бойынша ұлттық жүйе қалыптастырып жатыр. Бұл бағытта есепке алу, бақылау және тексеру жүйелері енгізілуде, сондай-ақ ағып кетулерді анықтау және жою шаралары қарастырылған.

Мамандардың айтуынша, шығарындыларды азайтумен қатар, климат өзгерісіне бейімделу де маңызды бағыт болып қала береді.

Қазірдің өзінде Орталық Азия су тапшылығы, шөлейттену және экстремалды ауа райы құбылыстарының жиілеуі сияқты күрделі салдарларға тап болып отыр. Қазақстан аумағының шамамен 76,1%-ы шөлейттенуге орташа немесе жоғары деңгейде бейім аймақтарға жатады.

Бұл жер ресурстарын ұтымды пайдалану, орман алқаптарын көбейту және экожүйелерді қалпына келтіру бағытында жүйелі әрі ұзақ мерзімді саясат жүргізуді талап етеді.

Айта кетейік, бұған дейін жердің тозуы мен шөлейттенуге қарсы Қазақстан қалай күресіп жатқанын жазғанбыз.