Қазақстан 2050: білім саласындағы жаңашылдықтар

Кез келген ұлттың болашағы ұрпағының білімімен өлшенбек. Көзі ашық, көкірегі ояу жас қана мемлекеттің іргетасын берік, келешегін кемел ете алады. 

Бүгінде әлем елдері де адами капиталды дамытуға ден қойып жатыр. Елде бұл бағытта «Қазақстан -2050» Ұлттық стратегиясы аясында атқарылған жұмыс аз емес . Нәтижесі қандай? 

Бәсекеге қабілетті білімді ұрпақ тәрбиелеу – Ұлттық стратегияда көрсетілген басым бағыттың бірі. Бұл межеге жету үшін елде ауқымды реформа жүргізілді. Ең әуелі мектепке дейінгі білім беру жүйесін дамытуға ден қойылды. Кешенді жоспарға сай екі және алты жас аралығындағы балалардың 95 пайызын қамту көзделген. Ал орта білімнің қолжетімділігін арттыру мақсатында биыл 200-ден астам мектеп салынып, шалғай елді мекендердегі білім ұялары жаңартылды. 

Айдос Жұманазар, сарапшы:

-  Бұрын ауылдық жердегі инфрақұрылым мәселесі үлкен проблема еді. Қазір тіпті қалада жоқ мектептер ауылдық жерде бар. Ол шешіле бастады. Екінші мәселе: ақпаратпен қамтамасыз ету және интернет мәселесі еді. Қазір ауылдың балалары да қаланың оқушылары сияқты интернет арқылы білім ресурстарына қол жеткізе алады. Алайда бұл жерде кадр мәселесі бар. Ауылдағы мұғалімнің білім сапасы қаладағы мұғалімнен қаншалықты алшақ соны да қарауымыз керек. 

Мектептің жаны – мұғалім  деген тәмсіл бар. Осы ретте ұстаздың мәртебесін арттыру, кәсіби білімді дамыту жайы назардан тыс қалмақ емес. Мәселен, кейінгі бес жылда елде мұғалімдердің жалақысы екі есе өсіп, кәсіби қарымын шыңдауға көңіл бөлінді.  «Келешек мектептері» бағдарламасы да өрендердің заманауи әрі қауіпсіз ортада білім алуына мүмкіндік ашты. Әсіресе апатты мектептер мәселесін жойып, қала мен ауыл арасындағы алшақтық азайды. Биыл дәл осындай озық үлгідегі 200-ден астам оқу ошағы пайдалануға беріледі.

Гүлмира Құрғанбаева, сарапшы:

-  Ұлттың сауатты болуы – ұрпағының білімімен өлшенбек. Сондықтан біз білім саласының әлеуетін бұрынғыдан да жоғары көтеруіміз керек . Өйткені бүгінгі экономика толықтай адам капиталына тәуелді. Әлемдегі кез келген 10 ірі компанияны алып қарасақ, онда негізінен әлеуеті мықты адамдар жұмыс істейді. Ал оның барлығы бала кезден алатын білімге байланысты. 

Елде ғылымға бет бұрған жастар саны артып келеді. Қазірдің өзінде олардың қатары 22 мыңнан асты. Жас өнертапқыштардың ізденістерін коммерцияландырып, қолдау көрсету – Президент жүктеген маңызды міндет. Жан-жақты дамыған, технология тілін білетін ұрпақ қана елдің берік ертеңін құрады. Әсіресе жасанды инлеллект дағдыларын ерте жастан меңгеру – заман талабы.

Айдос Жұманазар, сарапшы:

- Орта білімдегі мектепте 500 мыңға жуық мұғалім болса, қайта даярлаудан толығымен оқытып, өткізуіміз керек. Сонымен қатар бұл жерде «Өрлеудің» жай сертификат таратуын айтып жатқан жоқпын. Біз заманға сай қажетті мұғалімдерді, керек болса, өзінің пәнін қайтадан оқытып, цифрлық сауаттылықты міндетті етіп оқытуымыз керек. 

Білімді ұрпақ - ұлт айнасы. Ал «Қазақстан – 2050» Ұлттық стратегия елдің бұл бағытта ұзақ мерзімді дамуын айқындайтын негізгі құжат. 

Авторы: Назерке Тоқжан