Қазақстан энергетикалық қауіпсіздік саласындағы ықпалын күшейтіп отыр

Энергетика министрі Ерлан Ақкенженов халықаралық S&P Global агенттігінің Eurasian Energy бағыты бойынша вице-президенті Мэттью Сейгерс бастаған делегациямен кездесті.

Кездесу барысында жаһандық сауда ағындарының өзгеруі, энергетикалық нарықтардағы баға құбылмалылығы және әлемдік энергетикалық ауысымның болашағы талқыланды.

Энергетика министрінің айтуынша, көмірсутек шикізаты алдағы ұзақ жылдар бойы жаһандық энергетикалық қауіпсіздіктің негізгі тіректерінің бірі болып қала береді. Осыған байланысты Қазақстан мұнай-газ саласына инвестиция тарту, энергетикалық тұрақтылықты сақтау және экономиканы кезең-кезеңімен декарбонизациялау бағытын қатар ұстанып отыр.

Министр республика шетелдік серіктестер үшін сенімді әрі болжамды энергия ресурстарын жеткізуші мәртебесін нығайтуды жалғастыратынын атап өтті.

Тараптар сондай-ақ CERAWeek 2026 халықаралық энергетикалық форумының қорытындыларын талқылады. Форум Хьюстон қаласында өткен болатын. Кездесу барысында қазақстандық делегацияның Дэниел Ергинмен жүргізген келіссөздерінің нәтижелері де жоғары бағаланды.

Келіссөздер қорытындысында тараптар ақпараттық-талдамалық әріптестікті кеңейтуге дайын екендерін мәлімдеді. Ынтымақтастықтың негізгі бағыттары ретінде мұнай-газ секторындағы макроэкономикалық болжам жасау және жаһандық инвестициялық үрдістерге сараптамалық баға беру белгіленді.