Қазақстан КҚК дегі жағдайдан кейін Қашаған мұнайын Қытай бағытына жөнелтуде

Ел КҚК мүмкіндіктерінің шектелуіне байланысты Қашаған мұнайының бір бөлігін Қытай бағытына қайта бағыттап отыр. Консорциум әлі де тек бір жүк тиеу қондырғысы арқылы ғана жұмыс істеп тұр, деп хабарлайды Arasha.kz.

Reuters агенттігінің хабарлауынша, желтоқсан айында Қытайға 50 мың тонна мұнай жөнелтіледі. Бұл — Атасу — Алашанькоу маршруты арқылы Қашағаннан жасалатын алғашқы тікелей жеткізілім болмақ.

Украин дроны Қара теңіздегі КҚК теңіз терминалын бүлдіргеннен кейін консорциум үш жүк тиеу қондырғысының тек біреуімен жұмыс істеп жатыр. ВПУ-2 қатты зақымданған, ал ВПУ-3 жоспарлы жөндеуде. КҚК әлемдік мұнай жеткізілімдерінің шамамен 1 пайызын қамтамасыз етеді. Оның акционерлері қатарында Ресей, Қазақстан және АҚШ бар.

CNPC шамамен 30 мың тонна, ал Inpex — 20 мың тонна мұнай жіберуді жоспарлап отыр. Екі компания да Қашағанды игеретін North Caspian Operating Company (NCOC) консорциумына кіреді. Ресми мәлімдеме әлі жасалған жоқ. Қазақстанның Энергетика министрлігі ел каспий мұнайын экспорттаудың қосымша бағыттарын белсенді іздеп жатқанын ғана атап өтті.

Атасу — Алашанькоу құбыры Қазақстанды Синьцзянмен байланыстырады. Әдетте бұл бағытпен басқа кен орындарының мұнайы тасымалданады. Ал Қашаған мұнайын экспорттаудың негізгі жолы — Новороссийскідегі КҚК терминалы.

Қазір Атасу — Алашанькоу арқылы айына 85–86 мың тонна мұнай жіберілуде. Дереккөздердің айтуынша, 2025 жылы Қазақстан осы бағытпен 1 млн тонна жеткізуді жоспарлаған, бұл 2024 жылғы көлемнен (1,2 млн тонна) төмен. 2025 жылдың алғашқы он айында бұл құбырмен 0,85 млн тонна мұнай экспортталған.

Жуырда КҚК-ның зақымданған терминалы 11 желтоқсанға дейін толық қуатқа шыға алмайтыны белгілі болды.