Қазақстан мен Қытай авторлық құқық саласындағы ынтымақтастықты кеңейтеді

"Қазақстан авторлық қоғамы" республикалық қоғамдық бірлестігінің (ҚазАҚ) өкілдері Бейжің қаласында Қытайдың Музыкалық шығармаларға авторлық құқық жөніндегі қоғамының (MCSC) басшылығымен жұмыс кездесуін өткізді.

Тараптар авторлық құқықтарды ұжымдық басқару, цифрлық технологиялар және екі ел авторларының мүдделерін қорғау салаларындағы ынтымақтастықты дамыту мәселелерін талқылады, деп хабарлады ҚазАҚ-тың баспасөз қызметі.

"Қазақстан Республикасының Президенті Қасым-Жомарт Тоқаев еліміздің Қытай Халық Республикасымен жан-жақты стратегиялық әріптестікті нығайту бағытын нақты айқындап берді. ҚазАҚ бұл бағытты толық қолдайды және оны іс жүзінде дәйекті түрде жүзеге асырып келеді. MCSC ұйымымен бірге, өз елдеріміздегі CISAC-тың жалғыз мүшесі болып табылатын ұйымдар ретінде, біз бірыңғай халықаралық стандарттар негізінде жұмыс істеп, авторлар мен құқық иеленушілердің құқықтарын тиімді қорғауды қамтамасыз етеміз. Біздің ынтымақтастығымыз креативті экономиканы дамытуға, цифрлық трансформацияға және Қазақстан мен Қытай арасындағы мәдени ықпалдастықты нығайтуға елеулі үлес қосатынына сенімдімін", – деді"ҚазАҚ" РҚБ бас директоры Айнура Есендикова.

Кездесудің негізгі тақырыптарының бірі авторлық құқық саласында жасанды интеллектіні қолдану болды. Тараптар жасанды интеллект модельдерін оқыту кезінде туындыларды пайдалануды лицензиялау, жаңа технологияларды құқықтық реттеу саласындағы тәжірибе алмасу және авторлар мен құқық иеленушілерге арналған цифрлық сервистерді дамыту мәселелерін талқылады.

Сонымен қатар, кездесуге қатысушылар Қазақстан мен Қытайдың музыкалық нарықтарына бірлескен шолу дайындау мүмкіндігін қарастырды. Бұл лицензиялық қамтуды кеңейтіп, авторлық сыйақыны төлеу тиімділігін арттыруға мүмкіндік береді.

Бірлескен бастамалардың қатарында музыкалық авторлық құқық саласындағы қазақстандық-қытайлық жобаларды жүзеге асыру және Қазақстан мен Қытайдың Мәдениет жылы аясында түрлі іс-шараларды ұйымдастыру мәселелері де қарастырылуда.

ҚазАҚ мәліметінше, ҚазАҚ пен MCSC арасындағы ынтымақтастықты дамыту Қазақстанның Қытаймен стратегиялық әріптестікті нығайтуға бағытталған мемлекеттік саясатына толық сәйкес келеді. Соңғы жылдары екі ел мәдени-гуманитарлық және ақпараттық салалардағы өзара іс-қимылды белсенді түрде кеңейтіп келеді. Осы тұрғыда авторлық құқықтарды ұжымдық басқаратын ұйымдар арасындағы ынтымақтастық осы бағыттың маңызды құрамдас бөлігі болып табылады.

Кездесу қорытындысы бойынша тараптар халықаралық ынтымақтастықты одан әрі дамыту және авторлық құқықтарды ұжымдық басқару тетіктерін жетілдіру бағытындағы бірлескен жұмысты жалғастыруға ниетті екендіктерін растады.

Сурет: "ҚазАҚ" РҚБ

"ҚазАҚ" РҚБ ұсынған материал

Google News арқылы жаңалықтарымызды қадағалаңыз