Қазақстанда 30 сәуірге дейін Конституциялық заң жобалары Мемлекет басшысына ұсынылады

– Қоса беріліп отырған Қазақстан Республикасы Президентінің «2026 жылғы 15 наурызда қабылданған Қазақстан Республикасының Конституциясын іске асыру жөніндегі шаралар туралы» 2026 жылғы 17 наурыздағы № 1206 Жарлығын іске асыру бойынша бақылау (Бақылау) бекітілсін, - делінген құжатта.

Сонымен қатар бұйрықта құрылымдық бөлімшелер Бақылаудың мүлтіксіз және уақтылы орындалуын қамтамасыз етуі қамтылған. Оның орындалуын қадағалау Президент Әкімшілігінің Мемлекеттік құқық бөліміне жүктелді.

Аталған құжат 26 наурыздан бастап күшіне енді.

Бұйрыққа сәйкес, Мәдениет және ақпарат министрлігі 18 наурызға дейін жаңа Конституция мәтінін «Егемен Қазақстан» және «Казахстанская правда» мерзімді басылымдарында жариялауға тиіс болған.

Ал Әділет министрлігі наурыздың соңына дейін жаңа Конституция мәтінін нормативтік құқықтық актілерінің эталондық бақылау банкіне орналастыруға жауапты ретінде бекітілген. Ол үшін мәтінді «ҚР Заңнама және құқықтық ақпарат институты» ШЖҚ РМК-ге жіберуге міндеттелген.

Сонымен қатар ҚР Президентінің Әкімшілігі мүдделі мемлекеттік органдармен бірлесіп, бірқатар құжатты 30 сәуірге дейін әзірлеп, Мемлекет басшысының қарауына енгізбек. Олардың қатарында «Қазақстан Республикасының Президенті туралы» және «Қазақстан Халық Кеңесі туралы» Конституциялық заң жобалары бар.

Дәл осы мерзімде, яғни 30 сәуірге дейін Үкіметке бірнеше құжатты дайындап, ҚР Парламенті Мәжілісінің қарауына енгізу тапсырылды. Олар – «ҚР астанасының мәртебесі туралы» және «ҚР әкімшілік-аумақтық құрылысы туралы» заң жобалары.

Бұдан бөлек Үкімет, сондай-ақ орталық және жергілікті мемлекеттік органдар 1 шілдеге дейін нормативтік құқықтық актілерді ҚР Конституциясына сәйкес келтіру жөнінде қажетті шаралар қабылдайды.

Сонымен бірге Үкімет 7 сәуірге дейін ҚР Конституциясын ілгерілету жөніндегі жоспарды бекітпек.

Айта кетейік бұған дейін жаңа Конституцияның әр бабын заңнамада тәпсірлеп, іске асыру қажет екенін жазғанбыз.