Қазақстанда әуе билеттері қымбаттады сарапшылар себептерін атады

Қазақстанда әуебилеттер бағасы тағы да қымбаттады. Шілдеде жолаушылар тасымалы қызметінің құны бірден бірнеше пайызға өскен. Соған қарамастан, әуе тасымалына деген сұраныс артып келеді, - деп хабарлайды Tengri Travel Ranking.kz-ке сілтеме жасап.

Қазақстанда әуебилет бағасы қалай өзгерді?

Ұлттық статистика бюросы деректеріне сәйкес, шілдеде жолаушылардың әуе тасымалы қызметі құны маусыммен салыстырғанда 3,2 пайызға өскен.

Жыл басынан бері әуе билеттерінің бағасы өсіп барады. Айтарлықтай өсім наурыз және сәуір айларында тіркелді - сол кезде әуе тасымалдау қызметтерінің тұтыну бағаларының айлық индексі тиісінше 106,6 және 105,4 пайыз болды. Көктемнің аяғы мен жаздың басында бағаның өсу қарқыны біршама бәсеңдеді.

Бұл ретте шілдеде әуе рейстері 2025 жылдың шілдесімен салыстырғанда 10,8 пайызға қымбат болды. Салыстырмалы түрде алсақ, маусымда жылдық өсім 8,8 пайыз болған еді.

Әуе көлігімен тасымалдау қызметтері. Иллюстрация: ranking.kz

Ұшу құнының өсуіне бірнеше фактор бірден әсер еткен.

Соның бірі - демалыс маусымының қызған шағында халықаралық әуежайларда авиакеросиннің қымбаттауы. Бұдан бөлек, әуекомпаниялар әуе кемелеріне инженерлік-техникалық қызмет көрсету шығындарының артуына тап болды.

Бағаның көтерілгеніне қарамастан, қазақстандықтар ұшуды азайтқан жоқ. Керісінше, жолаушылар ағыны өсе түсті.

2026 жылдың қаңтар–маусым айларында қазақстандық әуекомпаниялар 7,4 миллион жолаушы тасымалдады. Бұл былтырғы сәйкес кезеңмен салыстырғанда 2,6 пайызға артық.

Қазақстандағы әуе көлігімен тасымалдау көрсеткіштері. Иллюстрация: ranking.kz

Қазақстанның әуекомпаниялары арасындағы ең ірі салық төлеуші Air Astana болып қала береді. Мемлекеттік кірістер комитеті мәліметінше, 2025 жылдың қорытындысы бойынша тасымалдаушы бюджетке 46,1 миллиард теңге аударған.

FlyArystan-ның салық аударымдары қызмет аясының кеңеюіне байланысты өсіп жатыр. 2026 жылдың қаңтар–шілде айларында компания 13,8 миллиард теңге аударды, бұл 13 миллиард теңгені құраған бүкіл 2025 жылғы көрсеткіштен де көп.

Қазақстандық әуекомпаниялардың 2021 жылдан 2026 жылға дейінгі салық аударымдары. Иллюстрация: ranking.kz

SCAT та салық төлемдерінің өсімін көрсетіп, бұл көрсеткіш бойынша тасымалдаушылар арасында екінші орында тұр. Qazaq Air-дің аударымдары соңғы жылдары тұрақты - жылына 1,2–1,6 миллиард теңге аралығында.

Тағы оқыңыз: Қазақстанда арзан әуе билеттерін сату ережесі өзгерді

Google News арқылы жаңалықтарымызды қадағалаңыз