Қазақстанда эковолонтерлер қозғалысы кең қанат жайып келеді Президент

– Бүгінгі Астана – тек саяси және экономикалық орталық қана емес, табиғатқа жанашыр, қоғам болашағына бейжай қарамайтын жандардың басын қосқан ортақ рухани кеңістікке айналып отыр. Бүгінгі басқосу экологиялық жауапкершілік мәдениетін орнықтыруға, мемлекет пен қоғамның күш-жігерін тоғыстыруға, ең бастысы – ізгілік жолында аянбай еңбек етіп жүрген азаматтарды қолдауға бағытталған маңызды қадам деп білемін. Мемлекет тарапынан елімізде волонтерлік қозғалысты, соның ішінде экологиялық бастамаларды дамытуға ерекше мән беріліп келеді. Бұл – болашаққа деген жауапкершіліктің, табиғатқа деген құрметтің нақты көрінісі. Мен үшін бүгін Мемлекет басшысы Қасым-Жомарт Кемелұлы Тоқаевтың сессия қатысушыларына жолдаған құттықтау хатын жеткізу – зор мәртебе. Ендеше, Ел Президентінің ыстық ықыласы мен жылы лебізін оқып берейін, - деді А. Балаева.

Аталған хатта Президент Өңірлік экологиялық саммиттің волонтерлік қызметке арналған сессиясының ашылуына орай өз құттықтауын жеткізген.

– Бұл – Қазақстанның бастамасымен Біріккен Ұлттар Ұйымы жариялаған Халықаралық еріктілер жылы аясында өтетін негізгі іс-шараның бірі. Қазір бүкіл әлем трансшекаралық, жаһандық сипаты бар климаттық сын-қатерлермен бетпе-бет келіп отыр. Оған төтеп беру үшін бірлесіп әрекет етуіміз керек. Осы орайда, Өңірлік экологиялық саммит пен арнайы сессиялардың аясында Біріккен Ұлттар Ұйымымен әріптестік орната отырып, Орталық Азияның тұрақты дамуына қатысты ортақ көзқарас қалыптастыру маңызды. Қоршаған ортаға қамқорлықпен қарау бірлесе өсіп-өркендеуге ұмтылған аймақ елдерінің де, бүкіл халықаралық қауымдастықтың да ынтымағын арттыра түсетін қуатты факторға айналды. Волонтерлердің бүгінгі басқосуы – соның айқын дәлелі. Еріктілер – ниеті түзу, жаны таза адамдар. Сіздер атқарып жатқан игі іс пен адал еңбек өзгелерге ерекше жігер береді, жарқын болашаққа деген сенімді нығайтады, - деп аталып өткен Қасым-Жомарт Тоқевтың хатында.

Мемлекет басшысы табиғат жанашырлары жыл сайын миллиондаған тал егетінін, тонналап қоқыс шығаратынын, жүздеген су қоймаларын тазартатынын және ағартушылық сипаты бар ауқымды бастамаларды жүзеге асыратынын сөз етті.

– Қазақстанда эковолонтерлер қозғалысы кең қанат жайып келеді. Ортақ іске 100 мыңнан астам жасампаз әрі отаншыл азаматымыз атсалысып жүр. Елімізде озық экологиялық ойлау мәдениетін дамытатын «Таза Қазақстан» жалпыұлттық жобасы іске асырылып жатыр. Жақында жалпыхалықтық референдумда қабылданған еліміздің жаңа Конституциясында табиғатты аялау және волонтерлік қызмет қоғам дамуының негізгі ұстанымдарының бірі ретінде көрсетілді. Қазақстан климатқа қатысты өзекті мәселелерді шешу үшін жүйелі жұмысты жалғастыра береді. Биыл елімізде Ақтаудағы Каспий аймағы мен Қызылордадағы Арал маңы аумағының табиғатын қалпына келтіруге бағытталған халықаралық волонтерлік апталықтар өтеді. Сіздерді өзара көмек, тілектестік және жауапкершілік мәдениетін орнықтыратын осы аса маңызды бастамаларға белсене атсалысуға шақырамын. Біз бәріміз күш жұмылдырсақ, күллі әлем көркейіп, таза әрі жайлы бола түседі деп сенемін, - деді Президент.

Бұдан бұрын хабарланғандай, кеше елордада Мемлекет басшысы Қасым-Жомарт Тоқаевтың қатысуымен «Орнықты болашаққа ортақ көзқарас» тақырыбымен Өңірлік экологиялық саммит (ӨЭС) жұмысын бастады.

Президент су қауіпсіздігі Қазақстан ғана емес, бүкіл Орталық Азия үшін аса маңызды мәселе екенін атап өтті.