Қазақстанның IT жобалары Таяу Шығыста кең танылып келеді

Қазақстанның IT жобалары Таяу Шығыс нарығында кең танылып келеді. 

Алды жергілікті талаптарға бейімделіп, ай сайын мыңдаған доллар табыс әкеле бастады. Озық бағдарлама жетекшілері осы арқылы елдің цифрлық шешімдер экспортын арттыруға ден қойған. 

Дубай – Таяу Шығыс аймағындағы ірі экономикалық әрі қаржылық орталық. Жер-жерден инвестор һәм қалталы кәсіпкерлер жиналған. Мол дәулет, көп жанға бас-көз болып отырғандардың айти жобаларға қызығушылығы басым. Қаржы құйып, қолданылу аясын кеңейтуге асық. Сол арқылы капиталын ұлғайтпақ. Сарапшылардың айтуынша, мұндай үрдіс әмірлік нарығына енген қазақстандық жобаларға да оң ықпал етуі мүмкін.

Димаш Қасен, инвестициялық сарапшы:

- Еліміздің стартап жетекшілері Дубай арқылы тұтас өңірге танылуға ниетті. Қазақстанда ойлап табылған өнертабыстардың енді осы араб жерінде кәдеге асатынына күмән жоқ. Осы арқылы қолданылу аясы кеңейіп, мол табысқа жол ашады деген ойдамын.

Бұған дейін Әмірлікте елімізге тиесілі арнайы инновациялық хаб болмаған. Алайда кейінгі жарты жылда жағдай түбегейлі өзгерді. Жоба жетекшілері «Тұмар» атты құрылымға бірігіп, жергілікті нарықта кедергісіз жұмыс істеуге кірісті. Осы уақыт ішінде қазақстандық цифрлық шешімдер бірнеше іскерлік алаңда таныстырылып, нақты нәтиже көрсете бастады. Мәселен, көлік тұрақтарын реттейтін қосымша ондаған сауда орталығы мен қоғамдық орынға енгізілді.

Марат Шотанов, қазақстандық стартап жетекшісі:

- Маусым айында қосымшаға алғашқы қолданушыларды тарта бастадық. Қазір Дубай бойынша ең танымал оншақты мекенжайда платформа жұмыс істеп тұр. Бос автотұрақты онлайн түрде анықтайтын жүйенің белсенді 2500 қолданушысы бар. Төрт ай ішінде 10 мың долларлық табысқа шықтық. Жалпы әмірліктегі 70-ге тарта мекенжайды қамтуды көздеп отырмыз. Сол кезде біздің қосымшаны 12 мыңдай адам пайдаланатын болады.

Тағы бір қазақстандық жоба жергілікті банктерде қаржылық басқару ісін  оңтайлындырып, жасанды интеллектіге негізделген көмекші ретінде кәдеге жарап қалуы мүмкін. Оның жетекшісі – Дәулет Айтмаханов. Айтуынша, бірнеше компаниямен келіссөз жүріп жатыр. Нақты нәтижесі бір жылдан соң белгілі болады. «Стартап ай сайын шамамен 10 мың доллар көлемінде пайда әкеледі», - дейді мамандар.

Дәулет Айтмаханов, қазақстандық стартап жетекшісі:

- Бұл нарықта екі айдан бері жұмыс істейміз. Алғашқы тұтынушыларымыз да бар. Олармен көп ұзамай әріптестік орнататын боламыз. Сөйтіп кәсібіміз жолға қойылады деген ойдамын.

Рауан Мыңбай, тілші:

- Араб жеріндегі «Тұмар» инновациялық хабында қазір қазақстандық 10 жоба сәтті сыналып жатыр. Солардың ішінен көп ұзамай «юникорн» шығады деген болжам да бар. Дубай, Абу Даби секілді ірі қалаларда мұндайға мүмкіндік мол. Себебі нарық үлкен әрі тұтынушы көп. Түптеп келгенде, мұның барлығы елімізге тікелей пайда әкеледі. Қазақ жерінде ойлап табылған стартаптар шетелде сәтті сыналып, ай-ти экспортты ұлғайтады.

Авторы: Рауан Мыңбай