​Қазақстанда көлікті сақтандыру құны өсті: ЖКО кезінде енді қанша төленеді

Қазақстанда көлікті міндетті сақтандыру құны орта есеппен 14 пайызға өсті. Полис бағасының қанша болғаны және кімдер үшін тарифтердің төмендегені туралы lsm.kz сайтына Қаржы нарығын реттеу және дамыту агенттігі (ҚНРДА) түсіндіріп берді.

Қаржы реттеушісінің түсіндіруінше, бағаның өсуіне екі негізгі фактор әсер еткен: айлық есептік көрсеткіштің өсуі (2026 жылы 1 АЕК — 4 325 теңге) және аймақтық түзету коэффициенттерінің орта есеппен 4 пайызға артуы (әр өңірдегі шығын деңгейіне байланысты).

Бүгінгі таңда Қазақстанда көлікті сақтандырудың орташа құны 23 870 теңгені құрайды. Дегенмен, соңғы баға әр жүргізуші үшін жеке есептеледі. Оған жүргізушінің жасы, өтілі, көліктің түрі мен шыққан жылы (7 жылдан асқан көліктер үшін полис қымбатырақ болады), аймақ және бұған дейін жол апатына түсу-түспеуі әсер етеді.

«Кейбір жағдайда сақтандыру жарнасы 100 мың теңгеден асып кетуі мүмкін. Бірақ мұндай жағдай жаппай кездеспейді және әдетте қауіптің деңгейіне байланысты. Мысалы, жүргізуші жиі ірі жол апаттарына себепкер болса, баға солай өседі», — деп атап өтті агенттіктен.

Кімге жеңілдік жасалды, ал кім бәрінен көп төлейді? 

Рөлге жаңадан отырғандарды жақсы жаңалық күтіп тұр. «Бонус-малус» жүйесінің коэффициенттерін қайта қараудың арқасында жаңадан бастаған жүргізушілер үшін сақтандыру 1,5 есе арзандады (олар үшін коэффициент 1,8-ден 1,2-ге дейін төмендетілді).

Әдеттегідей, полис үшін бәрінен аз төлейтін — жол апатына түспеген, ең жоғары 13-класы бар тәжірибелі жүргізушілер. Ал жол ережесін жиі бұзатын және адам өліміне әкеп соққан жол апатына себепші болған жүргізушілер (М2 класы) сақтандыру үшін орта есеппен 92 мың теңгеге жуық қаражат төлейді.

2026 жылы жол апаты кезінде қанша өтемақы төленеді? Жол-көлік оқиғасы (ЖКО) кезіндегі сақтандыру төлемдерінің шегі АЕК-ке тікелей байланысты және мынадай көлемді құрайды:

Бір көлікке келтірілген зақым үшін — 600 АЕК-ке дейін (2 595 000 теңге).

Екі немесе одан да көп жәбірленушінің мүлкіне келтірілген шығын үшін — жалпы жиынтығы 2 000 АЕК-ке дейін (8 650 000 теңге).

Адамдардың өмірі мен денсаулығына зиян келген жағдайда — жарақаттың ауырлығына қарай 2 000 АЕК-ке дейін (8 650 000 теңге).

Агенттік сондай-ақ жеңіл-желпі жол апаттары кезінде қазақстандықтардың полиция күтпей-ақ, мобильді қосымша арқылы Еуропротокол ресімдей алатынын еске салды. Мұндай жағдайда шығынның ең жоғары сомасы 100 АЕК-ті (432 500 теңге) құрайды.

Кеше, 16:00