Қазақстанда өмірлік қиын жағдайда қалған адамдарға қолдау көрсету ережелері жаңартылды

Жаңа бұйрық 2026 жылғы 10 наурыздан бастап күшіне енеді.

Жаңартылған ережелер өмірде қиындыққа тап болған азаматтарды анықтап, оларға көмек көрсету үшін білім беру, денсаулық сақтау, әлеуметтік қорғау, жұмыспен қамту, мәдениет, спорт, туризм, ішкі істер және басқа да мемлекеттік органдардың бірлесіп жұмыс істеу тәртібін айқындайды. Сондай-ақ, құқықбұзушылықтар, зорлық-зомбылық және әлеуметтік тәуекелдердің алдын алуға ерекше көңіл бөлінеді.

Әрбір адам немесе отбасы үшін Отбасын қолдау орталығы жеке жұмыс жоспарын әзірлейді. Бұл жоспар әлеуметтік оңалту, бейімделу және өмірлік қиын жағдайға қайта түсу тәуекелдерін азайтуды көздейді. Мемлекеттік органдар өз құзыреті шегінде көмек көрсетіп, жоспардың орындалуы туралы ақпарат беруге міндетті, ал орталық атқарылған шаралардың тиімділігін бақылайды.

Жаңа ережелер азаматтардың өтінішін күтпестен отбасының әлеуметтік жағдайын бағалау және оларға белсенді қолдау көрсету үшін цифрлық отбасы картасын қолдануды қарастырады. Ведомствоаралық жұмыстың тиімділігін бақылау және қолдау шараларын түзету үшін мониторинг пен талдау тоқсан сайын жүргізіледі.

Бұған дейін біз өмірлік қиын жағдайға тап болған адамдардың онлайн қалай көмек алатынын жазған едік.