Қазақстанда сауда өсімі баяулады: халық азық түлікке көбірек ақша жұмсап жатыр

Қазақстанда 2026 жылдың қаңтар-шілде айларында ішкі сауда көлемі 5,9%-ға өсті, – деп хабарлайды Aikyn.kz сайты.

Бірақ бұл көрсеткіш өткен жылдың сәйкес кезеңіндегі 8,6%-дан төмен. Сарапшылар сауда өсімінің баяулауын халықты несиелендіру қарқынының төмендеуімен және инфляциямен байланыстырады.

Бөлшек сауда көлемі алғашқы жеті айда 4,1%-ға артқан. Салыстырмалы түрде, 2025 жылы бұл көрсеткіш 5,9%, ал 2024 жылы 6,6% болған.

Сауда құрылымында азық-түлікке сұраныс айтарлықтай жоғары. Қаңтар-шілдеде азық-түлік тауарларының сатылымы 10%-ға өссе, азық-түлікке жатпайтын тауарлар небәрі 1,4%-ға артқан. Бұл халық шығынының негізгі бөлігі күнделікті қажетті өнімдерге бағытталып отырғанын көрсетеді.

Сарапшылардың пікірінше, тұтынушылық несиелеудің баяулауы халықтың ірі сатып алуларына әсер етіп отыр. Әсіресе техника, киім және басқа да азық-түлікке жатпайтын тауарларға сұраныс осы фактордан қысым көруі мүмкін.

Көтерме сауда да өсім қарқынын бәсеңдетті. Оның көлемі 6,7%-ға артқан, ал бір жыл бұрынғы өсім 9,5% болған.

Осылайша, Қазақстанда ішкі сұраныс сақталғанымен, саудадағы өсім қарқыны соңғы жылдармен салыстырғанда баяулап отыр.