Табыс азайып, халық азық түлікке ғана ақша жұмсай бастады

Қазақстан экономикасындағы негізгі драйверлердің бірі саналатын ішкі сауда секторы ЖІӨ-нің шамамен 19%-ын, жұмыспен қамтылған халықтың 17%-ын және белсенді заңды тұлғалардың 27%-ын қамтамасыз етеді, – деп хабарлайды Aikyn.kz сайты naryk.kz сайтында жарияланған материалға сілтеме жасай отырып.

2026 жылдың қаңтар–сәуір айларында ішкі сауда өсімі өткен жылдың сәйкес кезеңімен салыстырғанда 5,1%-ға жетті. Ал бірінші тоқсанда бұл көрсеткіш 4,8% болған. Соған қарамастан, қазіргі динамика былтырғы деңгейден төмен. Мәселен, 2025 жылдың алғашқы төрт айында өсім 7%-ды құраған еді.

Көтерме және бөлшек сауда сегменттерінде оң динамика сақталғанымен, өсім қарқыны баяулаған. Көтерме сауда көлемі биылғы төрт айда 5,9%-ға артты. Былтыр бұл көрсеткіш 7,4% болған. Сарапшылар мұны мұнай өндіру мен экспорт көлемінің төмендеуімен байланыстырады.

Көтерме сауда құрылымында азық-түлік емес және өнеркәсіптік-техникалық тауарлар басым. Бұл сегмент жалпы сауда көлемінің 67,3%-ын құрап отыр.

Бөлшек саудада да өсім сақталғанымен, тұтынушылық белсенділік әлсірегені байқалады. 2026 жылдың бірінші тоқсанында бөлшек сауда көлемі 2,8%-ға өсті. Алайда бұл алдыңғы жылдардағы көрсеткіштерден айтарлықтай төмен.

Сарапшылардың пікірінше, бұған жоғары инфляция, халықтың нақты табысының төмендеуі және тұтынушылық несиелеуге қойылған шектеулер әсер еткен. Атап айтқанда, 2026 жылдың бірінші тоқсанында нақты жалақы көлемі 2,3%-ға қысқарған.

Бөлшек сауда құрылымында азық-түлікке сұраныс артқан. Азық-түлік өнімдерінің сатылымы 10,5%-ға өссе, азық-түлік емес тауарлар сегментіндегі өсім небәрі 0,6% болды. Бұл халық шығынының негізінен күнделікті қажетті тауарларға бағытталып отырғанын көрсетеді.

Сарапшылардың бағалауынша, Қазақстан экономикасы тұтынушылық және инвестициялық белсенділіктің баяулау кезеңіне өтіп жатыр. Соған қарамастан, сауда саласы әзірге оң өсім аймағында сақталып отыр.