Қазақстанда тұрғын үй нарығы жанданды, бірақ Атырау облысы кері динамика көрсетті

2026 жылдың сәуір айында Қазақстанда тұрғын үй нарығы айтарлықтай белсенділік танытқанымен, Атырау облысы жалпы трендтен тыс қалды.

Ұлттық статистика бюросының мәліметінше, өңірде тұрғын үйді сатып алу-сату бойынша 779 мәміле тіркелді. Бұл наурыз айымен салыстырғанда 5,6%-ға аз.

Атырау облысы — бір ай ішінде мәмілелер саны азайған елдегі жалғыз өңір. Қазақстан бойынша жалпы көрсеткіш, керісінше, 23,4%-ға өсті: сәуірде 35 154 мәміле ресімделсе, наурызда бұл көрсеткіш 28 493 болған еді.

Басқа өңірлермен салыстырғанда Атырау облысы мәмілелер саны бойынша ең төменгі көрсеткіш иелерінің қатарында қалды. Тек Ұлытау облысында ғана көрсеткіш бұдан төмен болды (324 мәміле). Салыстыру үшін:

Алматы: 6 498 мәміле;

Астана: 6 193 мәміле;

Қарағанды облысы: 2 841 мәміле.

Сұраныс құрылымы: Не сатып алынды? Атырау облысындағы мәмілелердің негізгі бөлігі көппәтерлі үйлердегі пәтерлерге тиесілі — 489 мәміле. Жеке тұрғын үйлер бойынша 290 мәміле жасалды.

Пәтерлер арасында ең көп сұранысқа ие болғандары:

2 бөлмелі пәтерлер — 217 мәміле;

1 бөлмелі пәтерлер — 116 мәміле;

3 бөлмелі пәтерлер — 115 мәміле.

Сондай-ақ, 4 бөлмелі пәтерлер бойынша 26, 5 бөлмелі пәтерлер бойынша 6, ал 6 және одан да көп бөлмелі пәтерлер бойынша 9 мәміле ресімделді.

Жылдық көрсеткіште Атырау облысындағы құлдырау тіпті анық байқалады: 2025 жылдың сәуірімен салыстырғанда мәмілелер саны 25%-ға қысқарған. 2026 жылдың қаңтар–сәуір айларының қорытындысы бойынша төмендеу өткен жылдың сәйкес кезеңіне қарағанда 9,7%-ды құрады.

Осылайша, Қазақстанның жылжымайтын мүлік нарығындағы жалпы жандануға қарамастан, Атырау облысы айлық және жылдық салыстыруда теріс динамика көрсетіп отырған жалғыз аймақ болып қала бермек.

Бүгін, 15:30