Қазақстанда Ұлттық аграрлық ғылыми білім беру орталығы ғылым онкүндігі басталады

Ғылым күні қарсаңында «Ұлттық аграрлық ғылыми-білім беру орталығы» және оның еншілес ұйымдары отандық аграрлық ғылым жетістіктерін кеңінен таныту, қазақстандық ғалымдардың еңбегін көрсету және ғылымға қызығушылықты арттыру мақсатында ғылым онкүндігін бастайды.

Оның шеңберінде еліміз бойынша жүзден астам іс-шара өткізу жоспарланған. Олардың қатарында ғылыми конференциялар мен дөңгелек үстелдер, семинарлар мен дәрістер, көрмелер мен тәжірибелік көрсетілімдер, ғалымдармен кездесулер, сондай-ақ тәжірибе алқаптарына экскурсиялар мен көшпелі іс-шаралар бар.

Ауыл шаруашылығы министрлігі мәліметінше, іс-шара Қазақстанның барлық өңірін қамтиды. Оған мектеп оқушылары, студенттер, агробизнес өкілдері және барлық мүдделі азаматтар қатысады.

Бағдарлама «Ұлттық аграрлық ғылыми-білім беру орталығының» ресми сайтында — NASEC.kz — жарияланған.

Қазақстанда ғылыми зерттеулер мен әзірлемелерге (ҒЗТКЖ) бөлінетін қаржы өңірлер арасында айтарлықтай әркелкі. Мәселен, Маңғыстау облысы, Астана және Алматы қалаларында бұл көрсеткіш жоғары болса, Ұлытау мен Жетісу облыстарында керісінше төмен деңгейде қалып отыр.

Бұл ғылыми әлеуеттің өңірлер бойынша тең дамымай отырғанын аңғартады. Kazinform тілшісі мәселенің себептері мен оны азайту жолдарын саралап көрді.