Қазақстанда ұлттық кремний кластерін дамытуға бағытталған стратегиялық жоба іске қосылды

Алматы қаласындағы Инновациялық технологиялар паркі арнайы экономикалық аймағында Ұлттық кремний кластерін дамытуға және материалдардың толық өндірістік тізбегін қалыптастыруға бағытталған жобаны іске асырудың басталуын айқындаған уақыт капсуласын салтанатты түрде орналастыру рәсімі өтті, – деп хабарлайды Aikyn.kz сайты.

ҚР Президентінің жанындағы Ұлттық ғылым академиясының президенті Күрішбаев Ақылбек Қажығұлұлы салтанатты шарадағы сөйлеген сөзінде кремний саласын дамыту Қазақстанның жоғары технологиялы өнеркәсібін қалыптастырудың, энергетикалық өтпелі кезеңді қамтамасыз етудің және елдің технологиялық егемендігін нығайтудың стратегиялық негізі екендігін жан-жақты баяндады.

А.Күрішбаев өз сөзінде кремний өнеркәсібін дамыту Қазақстан Республикасының Президенті Қасым-Жомарт Тоқаев халыққа Жолдауында белгілеген экономиканы әртараптандыру, жаңартылатын энергия көздерін дамыту және тау-кен металлургия кешені аясында жоғары технологиялы өндірістерді іске қосу жөніндегі тапсырмаларға толық сәйкес келетінін атап өтті. Қазақстанда жартылай өткізгіштік кремний өндіруге арналған негізгі шикізат – кварцтың 40 миллион тоннадан астам қоры бар. Бұл елімізде:
шикізатты өндіруден бастап монокристалдық кремний құймаларын, жартылай өткізгіш пластиналарды және күн модульдерін шығаруға дейінгі толық технологиялық тізбекті қалыптастыруға бірегей мүмкіндік береді. «Критикалық материалдар өндірісі» жобасы аясында монокристалдық кремний құймалары мен жартылай өткізгіш фотоэлектрлік пластиналар шығаратын зауыт салу, сондай-ақ Кристалл өсіру және жартылай өткізгіштік инжиниринг зертханасын құру көзделген.

Ақылбек Қажығұлұлы атап өткендей, Ұлттық ғылым академиясының жобаға қатысуы:

ғылыми сүйемелдеуді;

озық технологияларды енгізуді;

іргелі және қолданбалы зерттеулер жүргізуді;

жоғары білікті кадрлар даярлауды;

R&D-инфрақұрылымды дамытуды;

патенттер алуды және халықаралық ғылыми басылымдарда нәтижелерді жариялауды қамтамасыз етеді.

Осылайша, ғылым, мемлекет және бизнес арасындағы ұзақ мерзімді индустриялық және инновациялық нәтижеге бағытталған кешенді өзара іс-қимыл моделі қалыптасуда.

Қазақстан Республикасының Премьер-Министрі Олжас Бектеновтың төрағалығымен еткен Кеңесте де кремний саласын дамыту мәселелеріне ерекше назар аударылды. Онда Ұлттық ғылым академиясының басым ғылыми-технологиялық жобаларды іске асырудағы және олардың нәтижелерін экономиканың нақты секторына енгізудегі рөлі ерекше атап өтілді.

Ұлттық кремний кластері жобасы Мемлекет басшысының тапсырмалары аясында жүзеге асырылуда, уәкілетті мемлекеттік органдармен келісілген және төмендегі міндеттерді шешуге бағытталған:

критикалық материалдар импортына тәуелділікті төмендету;

күн энергетикасын, микроэлектрониканы және фотониканы дамыту;

жаңа жұмыс орындарын құру;

елдің экспорттық әлеуетін арттыру.

Ұлттық кремний кластері Қазақстанның өнеркәсіптік және ғылыми-технологиялық дамуының негізгі драйверлерінің біріне айналуға қабілетті. Ал зертхананың ашылуы мен өндірістік қуаттардың іске қосылуы - елдің технологиялық тәуелсіздігіне, орнықты дамуына және болашағына салынған стратегиялық инвестиция.