Қазақстандағы дифтерия: соңғы жағдай қашан болды және қауіп бар ма?

Qazaq24.com, Tengrinews.KZ дереккөзінен алынған ақпаратқа сүйене отырып жаңалық таратты..

Италияның Палермо қаласында төрт жасар қыз бала дифтериядан қайтыс болып, кейін бұл инфекция оның бірнеше туысынан анықталды. Осы оқиғаға байланысты Ұлттық қоғамдық денсаулық сақтау орталығының мамандары Қазақстанда дифтерия кейінгі рет қашан тіркелгенін және инфекцияның қайта басталу қаупі неге сақталып отырғанын айтып берді, деп хабарлайды Tengri Health тілшісі.

Палермолық қыздың оқиғасы: не болды?

2026 жылғы 20 тамызда Палермода төрт жасар Анна Роза Бартолотта көз жұмды. Италиялық ANSA ақпарат агенттігінің мәліметінше, қайтыс болардан бірнеше күн бұрын қыз бала дене қызуының көтерілуі, құсу және тәбетінің болмауы белгілерімен ауруханаға түскен. Бастапқыда дәрігерлер оған тонзиллит (таңдай бадамша бездерінің қабынуы) диагнозын қойып, тексеруден кейін үйіне жіберген.

Алайда көп ұзамай қыздың жағдайы нашарлай бастады. Онда ауыр тыныс алу жетіспеушілігі өршіп, содан кейін бала Палермодағы балалар ауруханасының жансақтау бөліміне ауыстырылды. Дәрігерлер бар күшін салғанына қарамастан, Анна Роза 20 тамызға қараған түні қайтыс болды.

Бірнеше күннен кейін, 24 тамызда, Италияның Ұлттық денсаулық сақтау институты (ISS) қыздың биологиялық үлгілерінен Corynebacterium diphtheriae, сондай-ақ респираторлық дифтерияны тудыратын токсин гені табылғанын хабарлады, деп жазады жазады италиялық RaiNews қоғамдық хабар тарату қызметі.

Анықтама: Corynebacterium diphtheriae - бұл дифтерияны қоздыратын бактерия. Дифтерия - жедел жұқпалы бактериалды инфекция. Ол негізінен жоғарғы тыныс жолдарын зақымдайды, ал бактерия бөлетін токсин жүрек пен жүйке жүйесіне зиян келтіруі мүмкін. Көбінесе жөтелгенде, түшкіргенде және тығыз байланыс кезінде адамнан адамға жұғады.

Ата-анасы қызды вакцинацияламаған

RaiNews мәліметінше, Анна Роза дифтерияға қарсы екпе алмаған. Италиялық БАҚ-тың хабарлауынша, ата-анасы дәрігерлерге екпеге қатысты күдіктерін айтқан. Олардың сөзінше, жақын туыстары біріндегі аутизмді MMR (немесе ҚПҚ: қызылша, паротит, қызамық) вакцинасымен байланысты деп есептеген. Осыған байланысты отбасы қызына екпе жасатпауды жөн көрген көрінеді.

Бала өлімінен кейін Палермо прокуратурасы ата-анасына қатысты абайсызда өлімге әкеп соқтыру дерегі бойынша тергеу бастады. Тергеу баланың вакцинацияланбауы оның өліміне қаншалықты қатысы барын анықтауы тиіс.

Италиялық L'Unione Sarda аймақтық газеті Палермоның кәмелетке толмағандар істері жөніндегі прокуратурасы ата-ана жауапкершілігі мәселесін бағалау үшін бөлек азаматтық іс қозғағанын атап өтті.

Кейін қыздың анасы мен әкесі өз отбасына "вакцинацияға қарсы" деген сипаттама берілуімен келіспейтіндерін білдірді. Италияның Corriere della Sera ұлттық газетінің мәліметінше, олар қалған төрт баласының барлық тиісті екпені уақытылы алғанын айтып, Анна Роза неге вакцинацияланбағанын тергеуге түсіндіруге ниетті екенін жеткізген.

Дәрігерлердің іс-әрекеті де тергеліп жатыр

Тексеріс ата-анаға ғана қатысты емес. Қайтыс болған қыздың анасы дәрігерлерді "қызымды құтқару үшін қолдан келгеннің бәрін жасамады" деп айыптап, балаға бірнеше ауруханада көрсетілген медициналық көмекке қатысты шағым түсірді.

Нәтижесінде тергеуге сегіз медицина қызметкері тартылды. Тергеушілер дәрігерлердің инфекцияны қаншалықты дер кезінде анықтағанын және емдеу шараларын дұрыс жүргізді ме, жоқ па анықтауы керек.

Дифтерия туыстарынан да табылды

Анна Роза қайтыс болғаннан кейін Италия билігі эпидемиологиялық тергеу бастап, қызбен және оның отбасымен байланыста болған адамдарды тексере бастады.

Кем дегенде 10 туысынан дифтерияға тест нәтижесі оң болып шықты. Олардың көпшілігі - бала. Бұл туралы RaiNews хабарлады.

Дегенмен, оларда ауыр белгілер байқалмаған, өздерін жақсы сезінген. БАҚ мәліметінше, инфекция жұқтырған балалар вакцинацияланған болып шықты. Оларға антибиотиктермен профилактикалық ем тағайындалып, оқшаулану жөнінде нұсқаулық берілді.

Дифтерия Анна Розаның төрт жасар бөлесінен де табылды. Бала ауруханаға жатқызылды, бірақ ол екпе алғандықтан, жағдайы біртіндеп жақсарды.

Қазіргі уақытта италиялық мамандар инфекцияның таралу көзін және отбасына ауруды бірінші болып жұқтырған "нөлдік пациентті" іздеуді жалғастырып жатыр.

Қазақстанда дифтерия бойынша жағдай қалай?

Италиядағы жағдайға байланысты Tengri Health тілшісі Ұлттық қоғамдық денсаулық сақтау орталығынан пікір алды. Мамандар Қазақстанда дифтерияның тіркелу қаупі сақталып отырғанын ескертті.

"Қазіргі уақытта вакцинациядан, жоспарлы екпелерден бас тартуға (антиваксерлер) және иммунитеті жоқ балалар "қабатының" жинақталуына байланысты, республикада халық арасында дифтерияның жаңа жағдайлары тіркелуінің нақты қаупі бар", - деп хабарлады Ұлттық орталық өкілдері.

Бұл ретте Қазақстанда дифтерия жағдайы кейінгі рет 2008 жылы тіркелген. Ол кезде балалар арасында бес жағдай анықталған болатын: төртеуі Солтүстік Қазақстан облысында және біреуі Атырау облысында.

Қазақстанда дифтериядан кейінгі өлім жағдайлары 1998 жылы тіркелген.

"Қазақстанда дифтерияның ауқымды өршуі 1993–1998 жылдары болды. Осы кезеңде елде аурудың 2360-тан астам жағдайы ресми түрде тіркеліп, оның 80-нен астамы өліммен аяқталды", - деп хабарлады бізге Ұлттық орталық.

Дифтерия қайта басталуы мүмкін бе?

Ұлттық қоғамдық денсаулық сақтау орталығы егер адам қажетті ревакцинациядан өтпесе, теориялық тұрғыда дифтерия жұқтыруы мүмкін екенін атап өтті.

Мамандардың мәліметінше, 16 жастағы ревакцинациядан кейін ересек адамға әр 10 жыл сайын екпе салдырып тұру қажет.

Бұған дейін Қазақстандағы көптеген жас дәрігер өз тәжірибесінде дифтерияны кезіктірмегенін, ал адамдардың көбі полиомиелитке шалдыққан баланы ешқашан көрмегені туралы жазған болатынбыз.

Аурулар уақыт өткендіктен ғана жойылып кетпейді. Олар қоғам ондаған жылдар бойы таралуына мүмкіндік қалдырмағанда ғана қайтады. Инфекция әлемде, бірнеше елде ғана болса да, таралуын тоқтатпайынша, ол қауіпті болып қала береді. Қазақстандағы сырқаттанушылық деңгейі қалай өзгергені туралы толығырақ мына жерден оқыңыз.

Тағы оқыңыз: Қазақстанда ересектерге қандай екпелер қажет: тегін және ақылы вакциналар тізімі

АҚШ-та балаларға салынатын екпелер тізімі қысқартылды: бұл туралы Қазақстанның ДСМ не дейді?

Google News арқылы жаңалықтарымызды қадағалаңыз

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.