Гонконг тұмауы: Қазақстандағы жағдай, емдеу тәсілдері және алдын алу жолдары

Қазақстанда тез таралатын әрі ағзаға ауыр әсер ететін A(H3N2) «Гонконг тұмауының» белсенді таралуы байқалып отыр. Эпидемиологтардың айтуынша, қараша–желтоқсан айлары вирус жұқтырудың шарықтайтын кезеңі болуы мүмкін, деп жазады ҚазАқпарат.

Денсаулық сақтау министрлігінің дерегінше, эпидемиологиялық маусым басталғалы бері елде жедел респираторлық вирустық инфекцияның 1,46 миллион жағдайы анықталған. Бұл өткен жылмен салыстырғанда 20 пайызға төмен көрсеткіш. Алайда мамандар статистиканың ауыздықталуы вакцинациямен байланысты екенін, ал нақты тұмау деңгейінің керісінше өсіп жатқанын айтады.

Қараша айының басында Қазақстанда тұмаудың 590 жағдайы тіркелді, оның 587-сі — A(H3N2). Бір апта ішінде тұрғындар арасында 183 мың жаңа вирус жұқтыру оқиғасы анықталған. Алдағы айларда елде A(H3N2), A(H1N1) және В типті тұмау вирустары қатар тарауы мүмкін. Астанада да аурудың ауыр өтуіне байланысты шағымдар көбейген.

Мамандардың айтуынша, Гонконг тұмауының негізгі ерекшелігі – ауру белгілерінің тез және ауыр дамуы. Қарағанды облысының санитариялық-эпидемиологиялық бақылау департаментінің басшысы Юрий Залыгиннің айтуынша, вирус жоғары контагиоздылық пен мутациялық белсенділікке ие. Ауру дене қызуының 40°C-қа дейін көтерілуімен басталып, құрғақ жөтел, қалтырау, бас және бұлшықет ауырсынуымен қабаттасады. Асқынулардың даму қаупі жоғары, әсіресе 5 жасқа дейінгі балалар, жүкті әйелдер, егде жастағы азаматтар және созылмалы ауруы бар адамдар тәуекел тобына жатады. Көбіне пневмония, бронхиолит, ларинготрахеит және жүрек-қантамыр жүйесінің бұзылыстары сияқты асқынулар тіркеледі.

Инфекционист Айжан Иманова тұмауды кешенді емдеу қажеттігін айтады. Ең тиімді тәсіл – нейраминидаза тежегіштерін қолдану. Олар вирусқа тікелей әсер етіп, жасушаларға енуін тежейді. Сонымен қатар интерферондар мен олардың индукторлары ағзаның табиғи қорғанысын күшейтеді. Симптоматикалық ем ретінде дене қызуын төмендететін және қабынуға қарсы препараттар, қақырық түсіретін дәрілер мен мұрын тамшылары қолданылады. Мамандар жеткілікті су ішу, бөлмені желдету, тынығу сияқты қарапайым шаралар да асқынуды болдырмауға көмектесетінін атап өтеді.

Елде вакцинация науқаны жалғасуда. Биыл 2,1 миллион азамат екпе алған. Қолданылып жатқан вакциналар 2025 жылғы штамдарға, оның ішінде H3N2-ге қарсы бағытталған. Вакцина аурудың жеңіл өтуіне, асқыну қаупінің төмендеуіне және ұжымдық иммунитеттің қалыптасуына ықпал етеді. Дәрігерлер вирустың жаппай таралатын кезеңінде профилактикалық вирусқа қарсы препараттарды қолдануды да ұсынады.

Санитарлық қызмет өкілдері тұрғындарға адам көп жиналатын жерлерден аулақ болуды, жабық ғимараттарда маска тағуды, қол гигиенасын қатаң сақтауды, үй-жайды ылғалды тазалап, жиі желдетуді және ауру белгілері пайда болғанда өздігінен емделмей, дәрігерге жүгінуді ескертеді.

Аурушаңдықтың артуына байланысты кей өңірлерде вирусқа қарсы препараттарға сұраныс көбейген. Денсаулық сақтау министрлігі кейбір дәрілердің уақытша тапшылығы барын растап, жақын күндері қосымша жеткізілімдер болатынын мәлімдеді. Комитет төрағасы Бауыржан Жүсіповтің айтуынша, стероидты емес қабынуға қарсы препараттар мен олардың баламалары жеткілікті.

Мамандардың болжамынша, A(H3N2) вирусының ең белсенді таралу кезеңі қараша–желтоқсан айларына тұспа-тұс келеді, кейін жағдай біртіндеп тұрақтануы мүмкін. Вакцинация деңгейінің жоғары болуы әзірге ауруханаға жатқызулар санының күрт өсуіне жол бермей отыр. Дегенмен мутациялық қабілеті жоғары вирус әлі де бақылауды талап етеді. Сондықтан мамандар сақтық шараларынан бас тартпауға шақырады.

Еске салсақ, Денсаулық сақтау министрі Ақмарал Әлназарова тұмау вирустарының таралуы желтоқсанның ортасына дейін жалғасуы мүмкін екенін мәлімдеген еді.

Бүгін, 16:46