Қазақстандықтар ұшақ егеуқұйрықтарымен кездесіп, жолаушылардан мұқият болуды сұрады

Қазақстандықтар Дубайдан Ыстамбұлға ұшу кезінде болған ерекше оқиға туралы айтып берді: ұшақ қонған соң оларды полиция қызметкерлері бірінші болып алып шыққан, бұған қол жүгіндегі ақшаның ауыстып кеткені себеп болған, деп хабарлайды Tengri Travel.

Біздің WhatsApp нөмірімізге оқырман басынан кешкен жағдайды баяндап берді. Қазақстандықтың айтуынша, оның отбасы Flydubai әуе компаниясының Дубай – Ыстамбұл рейсімен ұшқан. Бортта ерлі-зайыпты мен екі кішкентай бала болған. Олардың жанында тек қол жүгі - рюкзак пен әйелдер сөмкесі болды.

"Сізді әуежайда полиция жасағы күтіп алып, ұшақтан бірінші болып шығарған кез болды ма? Бізде бұл бірінші рет болды. Мұндай оқиғалар туралы оқитынмын, бірақ бұл біздің басымыздан өтеді деп ешқашан ойламаппын", - деп бөлісті ол.

Оның сөзінше, ұшу алдында ол заттарының өзі қалдырған жерде тұрғанына арнайы көз жеткізген.

"Менің әдетім бар: ұшақта барлық затымды көріп отыру үшін өзіме қарама-қарсы қоюға тырысамын. Және ұшу уақыты қанша созылса да, жолда ешқашан ұйықтамаймын", - деді жолаушы.

Түнгі рейс кезінде, ұшудың шамамен төртінші сағатында әйел бірнеше қатар артта отырған ер адамның олардың орындарының үстіндегі жүк сөресіне жақындағанын байқаған.

"Бізден үш-төрт қатар артта отырған ер адамның жүк бөліміне сөмке сияқты бір нәрсе салып, заттарды тегістеп, бөлімді жапқанын көрдім. Қараңғы болғандықтан, анық көрінбеді", - деді ол.

Алдымен жұбайы рюкзакты тексеріп, күдікті ештеңе байқамаған. Алайда отбасы Түркиядағы туысын емдету үшін ірі көлемде қолма-қол ақша алып бара жатқан екен.

"Ақшаны тексерші дедім. Ол тексереді: конверт орнында, қолмен ұстағанда купюралар бар сияқты. Бірақ бірдеңе дұрыс емес. Өтінемін, соңына дейін жақсылап тексерші дедім", - дейді оқырман.

Қайта тексергеннен кейін ақшаның ауыстырылғаны белгілі болды.

"Конверттегі біздің барлық купюрамыз бір долларлық қағаздармен ауыстырылған екен. Бір доллардан барлығы 80 доллар", - деп атап өтті ол.

Осыдан кейін ерлі-зайыпты әйел бұған дейін жүк сөресінің жанынан байқаған ер адамға барды. Күйеуі онымен тікелей сөйлесті, ал жолаушы әйел ақша басқа біреуге беріліп кетуі мүмкін деп қауіптеніп, жанында қалған.

Оның айтуынша, экипаж мүшелері жолаушыға айып тағуға өкілеттіктері жоқ екенін және тек қонғаннан кейін полиция шақырта алатындарын түсіндірген.

"Сол кезде күйеуім оған: "Ақшаны қазір қайтарсаң - арыз жазбаймыз" деді. Ер адам келісіп, ақшаны қайтарды. Біз тараптан ешқандай жанжал мен агрессия болған жоқ. Оның тарапынан да", - деді оқырман.

Ыстамбұлға қонғаннан кейін барлық жолаушыдан орындарында қалуды сұраған. Содан кейін бортқа полиция қызметкерлері мінген.

"Ыстамбұлға қонған кезде барлығынан орындарында қалуды сұрады. Полиция келіп, бізді және әлгі ер адамды бірінші болып алып шықты", - деді ол.

Оның сөзінше, полицейлер арыз жазуды ұсынған, бірақ барлық процедураны ресімдеу бірнеше сағатқа созылуы мүмкін екенін ескерткен.

"Арыз жазғыларыңыз келе ме деп сұрады және бұл іспен айналысуға құлықты емес екендерін бірден аңғартты: әуежайда бес-алты сағат тұрып қаласыздар деді. Біз бас тарттық, өйткені келіскеніміздей ақша қайтарылды ғой", - деп түсіндірді жолаушы.

Сонымен қатар қазақстандық әйел полиция қызметкерлерінен ер адамның деректерін тіркеп қоюды сұраған.

"Бұл бір реттік жағдай емес, әбден қалыптасқан жүйе болуы мүмкін, әрі біздің рюкзагымыз салондағы бірінші нысана емес шығар деген оймен осы адамның деректерін тіркеуді өтіндік", - деп атап өтті ол.

Осы жағдайдан кейін ерлі-зайыпты бұдан былай ірі көлемдегі қолма-қол ақшаны алып жүрмейміз деген шешімге келген.

"Енді өзімізбен бірге ірі көлемде қолма-қол ақша алып жүрмейтініміз анық", - деп қадап айтты оқырман.

Сондай-ақ әйел "біреулер алып бара жатқан ақша туралы алдын ала білген болуы мүмкін" деген болжамдарға қатысты жеке түсінік берді.

"Бізді біреу "ұстап берді" деген сияқты барлық нұсқаларды бірден жоққа шығарамын: сома туралы ешкім білген жоқ. Біз декларация тапсырмадық, өйткені әр адамға 10 мың доллардан рұқсат етілген, біз төртеуміз және сома декларациялауға қажетті мөлшерден аз болды. Стюардессалардан да күдіктенбейміз, өйткені бұл Flydubai, тиын-тебен үшін мұндай тәуекелге бару ақылға сыймайды. БАӘ-нің қатал заңдары бойынша қалта ұрысынан түсетін күмәнді үлес үшін мансапты, депортацияны және нақты түрме мерзімін бәйгеге тігу - нағыз ақымақтық", - деді ол.

Сонымен қатар, оқырман мұндай қылмыстарды "ұшақ егеуқұйрықтары" (Air Rats немесе Flying Thieves) деп аталатындар жасауы мүмкін екенін айтты. Әңгіме тек ұрлық жасау үшін танымал түнгі рейстерге (мысалы, Дубай – Стамбул, Бангкок – Дубай немесе Еуропа ішіндегі танымал бағыттар) арнайы билет сатып алатын кәсіби топтар туралы болып отыр.

Олар құрбанды қалай таңдайды: ұрылар бортқа отыру кезінде-ақ салонды бақылап шығады. Негізгі нысана - жүк сөрелеріндегі жұмсақ рюкзактар мен сөмкелер, өйткені қатты чемодандардың құлпын ашу ұзақ уақыт алады және шу шығарады. Ұрлық тәсілі: Қылмыскерлер жолаушылар ұйқыға кеткен түн ортасында әрекет етеді. Олар өздерімен бірге алдын ала дайындалған "қуыршақтарды" - бір долларлық ұсақ банкноттар бумасын алып жүреді. Бұл иесі сөмкесін сипап тексерген жағдайда, конверттің немесе әмиянның салмағы мен көлемі визуалды түрде өзгермей тұруы үшін жасалады.

Зардап шеккен қазақстандық бұл оқиға оның сапар кезіндегі қауіпсіздікке деген көзқарасын толықтай өзгерткенін мойындады.

Қауіпсіздік жөніндегі сарапшылар ұшу кезінде құжаттарды, банк карталары мен қомақты ақшаны тек өзіңізбен бірге - белдік сөмкеде немесе киімнің ішкі қалтасында ұстауға кеңес береді. Оларды ешбір жағдайда жоғарғы сөрелердегі қол жүгінде, әсіресе түнгі рейстерде қалдыруға болмайды.

Google News арқылы жаңалықтарымызды қадағалаңыз

Жазылу