Қазақстанға келетін тревел блогерлерге бюджеттен ақша төлене ме

АСТАНА, 9 маусым – Sputnik. "Kazakh Tourism" АҚ басқарма төрағасы Талғат Ғазизов Қазақстанға келетін тревел-блогерлердің қызметі қалай төленетінін айтты, деп хабарлайды Sputnik Қазақстан тілшісі.

Бұған дейін Қазақстанға туристерді көптеп тарту мақсатында шетелдік тревел-блогерлер бірнеше рет шақырылған болатын.

"Kazakh Tourism-де блогерлермен жұмыс істеуге арналған бөлек бюджет жоқ. Қазақстанға шақырылған тревел-блогерлердің посттарына ақша төленбейді, оған бөлек ақша бөлініп отырған жоқ", - деді Ғазизов үкіметте өткен брифингте.

Компания блогерлермен "серіктестік айырбас" моделі негізінде жұмыс істейді.

"Мәселен, бізде әріптестердің пулы бар. Оған қонақ үйлер, мейрамханалар, туристік операторлар, әуе компаниялары кіреді. Олар бір жағынан елге көмектеседі, бір жағынан танымал блогерлер арқылы өздерін жарнамалайды. Біз өзімізді қызықтыратын нарықтардан, мысалы, АҚШ, Еуропа мен Қытайдан блогерлерді шақырамыз. Ондайда кейбір әуе компанииялары айырбас негізінде ол блогерлерді тегін әкелуге келіседі. Осылай барлығымен жұмыс істейміз", - деп түсіндірді Kazakh Tourism басшысы.